CHRISTMAS NI ENG

Chhandamtu pianna champha pawh a her chhuak leh hnai a. Khawvel kiar laia awm Mizoram leh Bethlehem dairehah te chuan khawvawh laiin he hun hlimawm tak hi kan thleng a, chutih laiin Australia ram leh chhimtawp ramte tan chuan nipui lai a lo ni ve thung a, tawnzau leh kekawr bul nena hmang mai mai tawkte pawh an awm ta ve ang.

Han hawi vel ila, mihringte tih loh thilsiam dangte chuan an hnathawh an chawlhsan a, an reh ta ṭhup mai. Chhandamtu piancham hmang tur hian thil siam dangte hi eng tiang angin nge an lo inpuahchah ve ang aw...

Rual ute hunlai chuan awlsam takin mawl takin Christ­mas an hmang mai. Christmas min ngaihzual tirtu chu Christmas thawm­hnaw kekawr thar, pheikhawk thar, kawr thar kan neih hunlai kha a ni. Mitthlaah a cham reng mai.

Mizo chhang chhum ah thar, thingpui sen leh kurtai an rawn sem a, kan lung a awi mai a. Ruaiṭheh nan changel hnah kan phah a, kan lung a awi leh mai a, mizopa inah ngei Christmas kan hmang ṭhin. Lal thar lo pianga chu Bethlehem Bawng Inah Ran chaw pekna thlengah puan nem chauh sinin kan tana lo kala chuan mamawh a nei tlem a, kan tan a lung a awi mai a ni.

Tunah chuan kan mamawh lam aiin kan duhna leh awhnain kan thinlung a luahlan ta zawk a. A nei deuhten thawmhnaw man to pui pui kan lei a, hei hi mi harsate tan en hrehawm leh ngaihthlak nuam lo a lo tling ta ṭhin a. An tan Christmas hman huphurh tirtu a lo ni ṭhin.

Chuvangin Christmas lungrual taka kan hman tlan theihna turin a neinungte pawhin nei lote tan thil kan tih kep ve hi thil hlu ber a tling ṭhin. Kan Lalpa chu Bethlehemah tlawmna nun nen puan nem chauh sinin, bul a rawn ṭan a nih kha.

Zokhuaa awmte chuan Christmas hlim taka an hman theihna turin an hnathawh lai zawh hman tumin an buai mup mup tawh a. Chutiang ang chuan khawpui lama awmte hian kan ti ve em? Zokhaw lama chengte hi hetiang kawngah hian kan pha lo hle zawk a ni.

Kan naupan lai huna Christmas kan hman dante khan lung a rawn ti leng vawng vawng a, lungduh mual liam tawhte min ngaihzual tir ṭhin.

‘I kal thuai ang u,

Bethlehem panin.

Tah chuan

kan va hmu ang,

ka Lal ka tana

lo kal chu’

Kan thinlung leh rilru te, kan nitin buaina te chin­fel tumin thawk thuai thuai ila, chu inbuat­saihna chu Christmas hlim taka kan hman theihna tur a lo ni ang.

- H.Neihchungnunga Durtlang North