NPRS (New Panchayati Raj System) hman loh chhan

Tunlai Mizoram khawvelah Decentralisation Power tlangau pui mek an awm a, eng nge a nih leh kan political system hi hmang turin a inpeih em tihte ngaihtuah tlan a hun ta hle mai.

Khawvelah sawrkar inrel­bawl dan chi hrang a tam hle a, chu mi karah chuan democracy hman dan chi hnih centralised democracy leh decentralised democracy chuan engkim thuneihna pumhlum thlan lalte leh anmahni puibawmtute leh sawrkar top official-te kutah a inchhung khawm a. Decentralised democracy-ah chuan thuneihna insem zaiin sum leh paia thuneihna chenin chan tur chin an nei ṭhin.

India sawrkar kalphungah centralised democracy rei tak hman a ni ṭhin a, thuneitute chauh an hausa a, mipui nawlpui an rethei tual tual tih Prime Minister Rajiv Gandhi khan a hmu ta a. A hnua Prime Minister Nara Sinha Rao-a ho khan 22nd December, 1992 ah Parliament-ah pass-in NPRS a hmaa Constitution Preamble (duha hman theih) tih chauh chuang chu Art 243-ah dahin hman tur tih a ni ta a ni.

Decentralisation of Power hi ‘Good Governance’ tih a ni a, tunlai sawrkar hnathawkte zingah sawi a hlawhin poli­tician-te pawhin an tlangau pui ṭhin a, a taka hmang tura policy a telh leh proposal siam ta erawh hriat tur an awm lo. Kum sawm chuang sawrkarna lo chelh tawh ve ve MNF leh Congress te chuan an hre reng naa an hmang duh hauh lo a, tunah an party manifesto-ah pawh khung mahse an hman tak tak a rinawm lo.

NPRI/ NPRS thupui chu “mipuite hnenah thuneihna pe rawh u” tih a ni. He Good Governance policy ang chuan VC & LC, Block, District level-ah te mipui aiawha thlan tlinten thuneihna neiin ro an rel anga an huam chin population based-in budget te neiin financial power an hmang thei dawn a ni. Chung VC/LC, etc budget anmahni ṭheuhin an duan chu Block, District, state level committee ten endika passed a nih hnuah central sawrkarin a pawm hnuah state sawrkar sum bawm a thlen aṭangin ni 10 chhungin budget neitute hnena pek chhuah vek tur tih a ni; khua leh veng VC/LC nei zawng zawngte chenin assembly session an nei thei dawn tihna a nih chu.

Eng vangin nge rorelna chelh tawh leh chelh mek party te hian an tuipui tak tak loh kan tih chuan an hlutna tlahniamin anmahni tlawntu an tlem phah ang a, chu bakah financial power an neih hlutna tlahniam tur leh corruption practice tur duhthala chetna tur a tlem ang a, mipuiin an ngaihsanna tlahniam tur an ngai ngam lo a ni ti ila a sual awm lo ve.

Tuna kan dinhmunah hi chuan MLA etc. kan thlang tlinga kan in tlawn siak zui a. Minister, etc. an nih phei chuan tha tam tak sengin an zar zo tumin kan buai zui leh a, an phungbawm sawrkar hnathawkte chenin tih lungawi dan ngaihtuahin rilru sen a ṭul a, chutianga vir buai tam tak zingah tlemte chauh an lungawi ṭhin. A thlang tlingtu party a inngai lo te tam tak phei chuan an term an hman zawh hun nghakin an sepui ruah tuar tlawk tlawk mai a ni.

Central sawrkar ngeiin hman tura a paseed tawh, ‘mipuite hnenah thuneihna pe rawh u,’ tih chu state sawrkar level-ah ‘Good Governance’ tiin ngaihsak lo nih hlauin discussion, training, etc in an tikhawtlai mek a ni a. He thil hi Mizoram mipuite hian hre chiangin tuipui phak chu ni sela a nawra an nawr chhuah duh mai a rinawm tawh a ni.

- Lalmama, Lunglei