KAITHO TA CHE
Zing karah han léng kual ila, dar 8 thleng thleng hian ṭhalai hi an la reh ṭhuap mai a, nu leh pa hi an che sawk sawk a, 'Khawnge?' han ti ila, 'Nizanah an meng rei a niang' te hi an ti niah niah a, a ṭhen chuan, 'Ka kai tho peih tawh lo, an duh chen chen mu rawh se. An zah loh a liamah...' te hi an ti bawk a, ka lung hi a va awi lo thei tak. Nungchang ṭha lo, nunphung mumal pawh nei lo, rui fote hi chu thu dang pawh ni se, Kohhrana inhmang
ṭhalaite pawh hi, an vai chuan ni lo mah se, tam tak hi chu engmah an ni tak tak lo-in ka hria, khua lo thim se, phingphihlip ang maiin an lo chhuak leh sup sup a! Phingphihlip ṭhalai...
A thiam lo hmasa chu nu leh pa kan ni ka ti tho tho. Engah nge kan kaihthawh loh? 'Ka fate hi chu kaitho lo ila Nilai-ah pawh an tho nang mawle' tih ang hi kan tam. An dam a nih chuan tho rawh se!
Dr Luke Sangkima hian a fate hnenah, 'A mut lam chu in thu, a thawh lam chu ka thu' a ti e, an tih ka lo hria a, hei hi pa âw tur chu a ni. Pa berin a kaihthawh dawn miau chuan an meng rei lutuk lo ang, mut an kham loh chuan a hrehawm dawn tlat. Zinga duh chen chen an mut kan remtih hian zana men chiam an dawklak a, an taksa pawhin a ngeih lo, an hmai bawlte hi bazar nepnawi hnawiha chin fel mai chi pawh a ni lo!
Thawh tlai reng mai hi Pathian thu pawh a ni lo hrim hrim a, zan hi mut hun, zing hi thawh hun atana Pathian ruat a ni. Zana men chiam a, zinga mut nghek ching hi 'zan sawn' an ni a, Pathian thu awih lohna a ni.
Mitthi avang te, dam lohna, eizawnna leh thil pawimawh dang avanga tlaivar leh men reite hi chu thu dang daih a ni. Tih tur pawimawh neih vang ni mang si lo, phone khawih leh TV en tih vel vang mai maia rei deuh deuh men hi taksa-in a tuar bâkah thil tam tak a hek a, mit a hek bawk a, High School kan kal chhung khan kan pawlah Maremi leh Liankima tih loh chu tarmit vuah pawh ka hre lo. Tunah chuan Anganwadi aṭangin kan vuah a ni ber tawh a, kan mit kan dim lo lutuk hi a la pawi dawn chauh.
Hmanah ka sawi tawhin ka hria a, Pu V. Hawla phei kha chuan in leng pawimawh deuh a neih pawhin dar 8 a rik chuan, 'Min hrethiam ula, ka mut a hun tlat mai' a ti mai ṭhin an ti. Hetiang êm hi chu inphût ngam lo mah ila, nu leh pate hian mut hun leh thawh hun i rél fel deuh teh ang u. Zinga inkaih thawh takngial pawh kan ngam loh chuan, kan chhungkua chu a ngaihtuahawm thei hial ang. Thawhlehni khan BCM Upa K. Lalrinmawia a boral a, zing dar 5-a an nupaa an ṭawngṭai laia boral a ni. Hmanah khan Mission Venga KṬP hruaitu, Pu Siama te chhungin zing dar 5-ah chhung inkhawm an neih ṭhin bawk kha mawle.
Hetiang tak hi kan nih ve theih loh pawhin, dar 7-ah tal in chhungkua in nung kim thei em le? Hmanlai ang kha ni se, zing dar 8-ah khaw dangin min rún ang tih a hlauhawm lo maw?
- RK Lianzuala