Garage i nei ngei ang tiraw

Mizoram sorkar, Transport department chuan hman aṭang khan lirthei neitute garage nei vek turin a hriattir a, hriattirna pawh hun rei fe tawh aṭang khan a hriattir tawh nghe nghe kha. Kawng kamah i lirthei hnawksak taka i dah ṭhin kha i in chingfel hman dawn em. Garage i nei ngei tawh ang tiraw?

Traffic manage­ment committee, home minister ho meuha din chuan garage a ngai pawi­mawh a, hei hi kan khawpui chep lutuk tih ziaawm nana tih a ni. Tunah pawh indinchhawk a buatsaih mek a nih hi. Tuna sorkarin a ruahman dan en hian ngaihdamna a awm dawn lo niin a lang. Transport department mai ni lo, trafic police te, AMC leh local council te nen an ri rup mai dawn a ni a, local council lahin an thlawp ṭha dawn si a, kawng sira lirthei dah mai mai chu man hmiah hmiah mai tawh tur a nih hmel.

Transport depart­ment chuan Sep­tember 1, 2010 aṭang phei kha chuan garage nei lo tan registration a phal tawh lo a, khatih hun aṭanga tun thleng hian garage nei si lo, mi garage lo kawk mai mai an tam awm mang e. Heti em ema kawng sira lirthei kan park tam danah hian. Tunah hian September 1, 2010 hnu lamah a hma lama register-te thlengin an vaihma turah ntgai i la, lirthei neitute'n dan kan zawm chuan khawpui pawh a thawl deuh dawn a ni.

Kei chu sorkarin heti taka hma a la a, December 1 aṭanga dan zawm lo laka khawng tawka hma a la tur hi a thlawpawm hlein ka hria. Local council zawng zawngin garage nei leh nei lo an veng ṭheuhah an finfiah vek tawh tura ngaih a ni a, veng ṭhenkhat phei chuan garage neite hnenah certificate a pechhuak ta hial mai. Chuvangin namnul mai mai theih a ni tawh dawn lo.

Mipui vantlang pawhin he hmalakna hi ṭha kan ti a, kan thlawp hle tih a lang. Mi tlemte thu awih loh vanga kan kawngpui chep lutuk hi kan ning ve ta a ni. Hmun ṭhenkhatah phei chuan lirthei chhia, kawngpui sira in hung chawt a tam hle. Heng pawh hi vai hma chi a ni ang a, kawng kama zan riak lirthei pawh thenfai kelh chi a ni ang.

Lirthei kan ka lei ve dawn khan a dahna tur ka neih hma kha chuan ka lei ngam hauh lo. A dahna tur garage ka neih hnuah chauh ka lei a, midang tan hnawksakin ka dah ngai lo. Chu bakah nuai tel teh meuha ka lirthei lei kha kawng kamah ka dah phal miah lo bawk. Engtin nge mi hian nuai tel meuha an lirthei lei kawng kamah zan tlaivar ṭhak ṭhaka an dah phal zawk le!

Naktip December 1 aṭanga dan kauh tak an hman tur hian awmzia nei ngei se, a kengkawhtu lam pawh khawng hle phawt mai se a ṭha awm e. Dan kengkawhtute pawh theihtawpin kan pui ang chu. Kan veng ṭheuh enkawltu local council leh sorkar an inthurual bawk a, khawpui nuam siam turin ṭan i la sauh sauh ang u.

- Lalkhirhvela