World Cup a champion tawhte
Football World Cup-a champion ngun ber chu Brazil niin vawi nga an champion tawh. A dawtah Germany leh Italy niin anni hi vawi 4 ve ve an champion tawh bawk. Argentina, France leh Uruguay chu vawi hnih ṭheuh an champion tawh bawk a ni.
Champion tawh ram zingah hian kumina World Cup khel lo Italy an awm a, anni tih loh, lo champion tawhte hi kumin World Cup-a champion tura rinkai berte zinga mi vek an ni. Mahse infiamnaah chuan thilmak thleng thei a ni a, kan rinloh zawng pawh thleng vek thei a ni. UEFA Euro Cup 2016 khan inkhel ngaina zinga a tam zawk chuan atira Portugal champion ring an tam lo viau ang. Mahse khami ṭum khan an champion tlat.
Kumin World Cup-ah hian tunge champion dawn chu sawilawk a harsa hle a, ramin an player neih ṭhatte a thlankhawm inkhel tur an nih angin, eng ram pawh hi an nep tia sawi theih an ni bik lo ang.
A continent ang zawngin sawi ta ila World Cup-ah hian Europe ram an champion ngun ber. 2002 a Brazil an champion hnuah erawh Europe ramte an in champion chhawk a ni deuh ber mai. Kumin hian South America ram aṭang hian rawn champion thei kan hmu dawn em, tih chu hunin a la rawn hril ang chu.
Football World Cup-a champion hmasa ber chu Uruguay niin an ni hi 1930 khan an champion a, a hnu kum 1950 khan a vawi hnih nan an champion leh. Kum 1934, 1938, 1982 leh 2006 khan Itlay an champion tawh a, mahse kuminah erawh vanduaithlak takin World Cup an khel lo.
Kum 1954, 1974, 1990 leh 2014 khan Germany hi an lo champion ve tawh bawk a, anni ram hi World Cup-a final lut ngun ber niin vawi li lai World Cup final khel tawh an ni. Kum 1978 leh 1986 khan Argentina an champion a, 1986 phei chu Maradonna vanglai ani nghe nghe.
France hi kum 1998 leh 2018 khan an champion a, kumin World Cup-ah pawh hian champion leh turin mi tamtakin an ngai. England hi Mizoram buai lai kum 1966 khan an champion bawk a, a hnu lamah Champion lo mahse Covid vanga an sawn hlat UEFA Euro Cup 2020 khan final an lut pha ngat a ni.
An player-te hmelṭha an tih vanga hmeichhia tam takin an ṭan Spain hi World Cup-ah kum 2010 khan an lo champion ve tawh bawk a, khatih hunlai khan Spain player te kha an ṭharual hle a, midfield-ah phei chuan a hunlaia a berte zinga mite an kawl.
- R Thangpuia