Youth Commission hi tunge enkawl ta ber?

Kan office dawr tur awmna building chu AIS Transit Accommodation Building tih a ni a, kan la hriat ngai loh a ni a, midang kan zawhte pawhin chiang takin min hrilh thei bik lova, a building zawn hmuh ngawt pawh a awlai lo hle. New Secretariat Complex tawntirh aṭangin kan zawt thla zel a, hetiang building hi hmun hnihah a lo awm lehnghal a, kan kal tumna chu a thlang zawk a lo ni a. A chhak zawk building a Mizoram Information Commission nghaktute chuan ṭha takin min lo dawngsawng a, kan kal duhna office chu Youth Commission hote nen building pakhatah an awm thu leh MPSC office bul lawk a nih thu min lo hrilh ta hlauh a, chu lam chu kan pan thla ta zel a.

Chu building luhthlakna bul kawngsira waiting shed niawm takah chuan tlangval rual khat hian meizial an lo zu khu luih luih mai a, Pi ber ho in kan sorkar chak takin meizial zuk a huat tehreng nen chutia kawngkam maia meizial an lo zu luai luai mai chu mak tih mai pawh awl tak a ni. Office dawr kan tum awmna chu kan han zawt a, tuman an hre lo a. Youth Commission office nen building thuhmunah an awm tih min hrilh tawh avang khan Youth Commission office awmna kan han zawt leh a, an zinga pakhat chuan en pawh min en mang lo khan, “Khu” a ti a, a thian dangte phei chuan ring tak takin thildang an sawi a, min uksak lo hrim hrim a ni.

Chu building chu kan pan thla ta a, a hulhliap sirah chuan nula tlangval rualkhat hi an lo ṭhu leh a, an zinga mipaho chuan meizial an zu deuh vek a, hmeichhe pakhat pawhin inthlahrung lem lo takin a lo pet kawh mek bawk a, ring tak takin an titi a, an nui vak vak a. Kan kal tumna bawk chu kan va zawt leh a, tuman an lo hre chuang lo a. An zinga pakhat chuan nui chung hian, “A chhungah khan va lut ula, a tawpah bang a lo awm ang a, a thim mup ang a in bo der mai ang,” zuk han ti a! Hmeichhe meizial zu mek khan kan hriat phak ngei tur hian, “Youth Commission hnuaia training mek tih vangin thil zawng zawng kan hre bik hleinem,” a han ti zui leh bawk a, a aia ring mahin an nui zui a, kan zawt ta kher kher chu kan inchhir viau.

Kan kal tumnaah chuan kan tihturte kan tih zawh chuan thingpuite min intir avangin kan ṭhu khawmuang a, kan titi zui a, chu office a thawk ṭhenkhatte pawh chuan Youth Commission hnuaia ṭhalai training hote hawihhawm loh ṭhinzia leh nunphung an hriat lohzia sawi tur an lo nei ve nual a. Building khata inawmchilh an nih avangin an lo hre viau a, phaiah hnamdang zinga hnathawk turin kan hotute hian hetiang ang vel hi an lo vailiam chur chur ṭhin em ni tih chu rilruah zawhna a awm lo thei lo. Hman deuha Delhi Mizo Welfare hruaitu pakhatin Delhi a kan lo buaipui hnem ber chu Mizoram Youth Commission rawn tirh thlakte an ni a ti nia an sawi pawh kha a dik thei mai awm mange kan ti ta.

Khu building-ah khuan Youth Commission hian Training Hall an nei niawm tak a ni a, a hre chiangten an sawi hmangin an hmunhma an uluk lo hle a, an che ṭawp hle bawk an ti a, hotu mumal nei loa thil ti ve mai mai an ang hle tihte pawh sawi a ni. Kan haw lamah ngun zawkin kan han thlek a, corridor a an tui inna filter bul chhuatte chu tui an tihbuak nasat avangin a chiau kawi nuai a, a bal em em a, chu lai tak chu chu building pumpui luhka ber a ni bawk si a, a building pumpui pawh a ti zahawm lo hle. Kan hmuh lai ngeiin a building bang zunkhuma zung mek pawh zuk awm a!

Khulaiah khuan sorkarin office pawimawh tak tak a dahkhawm a, officer leh staff zahawm tak tak an kal nitin a. Ṭhalai hawihhawm lo leh inthlahrung lem lo tak takte nen office hmun pawimawh khutianga hmun khata chhunkhawm ruih mai khu tihphung dik a ni ang em? Youth Commission hian Dinthar Venga an pu hlui in kha cheng nuai tam tak hmang zo vekin ṭhalaite training na atan an chei vak ni khan a lang a, khang building te kha a nih dan turin leh sorkar sum hmanga chei a nihna ang tak khan hman ṭangkai zui a ni zel em? Nge a dik a dawk thlu lo a ṭhalai tam tak phai lama vailiam zur zurtupa, a in neitupa ni bawk, an pu hlui ni bawk khan a duh angin a hmang leh ta zet zet mai zawk em ni? Dinthar Venga sikul building pakhat sorkar sum hmanga an chei vakte kha an la hmang ṭangkai zel em? Khulaia sorkar hmun pawimawh, office pawimawh awmkhawmnaah khutia enkawltu mumal awm lo ang maia ṭhalai fuankhawm tir khu tihphung dik a ni ang em?

Tin, Mizoram Youth Commission hi an hotute an suspend zo tawh si a, tunah hian tunge enkawl ta ber? Nge, suspend hming pu siin an hotu tu emawte chu sorkar hian a rukin an la kir leh tawh a, a ruk a ralin Youth Commission-ah hian an thawk leh reng tawhte hi a ni mai mai lo maw? Enfiah tur hi a awm leh ta nual mai.

Sorkar hian a ti rau rau a nih chuan awm­ze neiin leh mumalin thil ti se, khung ṭhalai fuankhawm ṭhinte pawh khu phaia tirhchhuah tlakin buatsaih se, hnam­dang zinga khawsa tlakin chher se. Mahni training hall bang zunkhum tur tur chite pawh nunphung pangngai zirtir se, kawngkama meizial zuk luai luaite hi hnam­dang zingah a remchang lem lo tihte zirtir se, hawihhawmna te pawh a hranpa hlaka zirtir tham an kawikhawm a nih mahna.

TV camera hmaa vailiam zung zung ringawt mai hi chu phaia Mizo Welfare hruaitute phurrit belhchhahna mai mai a ni tih hre ve tawh se. Lu pan hnathawha ti ve der der ringawt loin sum leh paite pawh a nihna tur ang takin hmang se a ṭha ang. Chuti lo zawng an rin aia nasa in an mualpho leh mai ang tih pawh a hlauhawm.

- H. Lalthanliana, Republic Veng