MBOCWWB kan la theihnghilh lo

Vanglaini No­vem­ber ni 25, 2017 (Inrinni) chuaka Mizoram Buil­ding and Other Con­struction Worker Welfare Board (MBOCWWB) chung changa Vanglaini palai zawhna Labour, Employment, Skill Development & En­tre­prenuership (LESDE) Jt. Director K. Valy a chhanna an rawn tarlanah khan, MBOCWWB a thawktu mi 36 lai an ban hnuah harsatna an tawh loh thu leh, LESDE department aṭangin thawktu ṭhenkhatin MBOCWWB an vil chu a hma (thawktu an awm dur dur lai) aia a kal mumal tawh zawk hial thu a sawi khan a hmaa he department enkawltu Minister leh department hotute thil tih duh dan a tarlang chiang hlein ka hria.

A sawi zelna han chhiar zel phei chuan MBOCWWB lo en­kawl hmasatute tan chuan zaka kimkit chawih chawihna tham niin ka hria. An hna lakte reng reng lah kha dan loa lak, full pay salary pek ni lawi si a nih thu te, lirthei lah kha an lo lei nasa ngiang mai tih a rawn sawi ta vek a. Mualpho loh ngaihna kha a lo awm lo a ni.

State dangah phei chuan nodal department-in keng­kawhin muster roll pahnih/ khat enkawl theih tawk lek a lo ni awm lehnghal a. Kan kalphung leh thuneituten kan thuneihna kan hman duh dan en hian hmasawnzia chu kan pu lo a lo ni. A zia lo ṭhin ngei mai.

MBOCWWB buaina kha Mizo mipuite hian kan la theihnghilh lova. Tu minister nihna hnuaia buai nge a nih a, tu officer nihna hnuaia buai nge a nih tih hi an minister puite leh an officer puite hian an chiang lehzual ngei ang.

Hei mai hi a la ni lo. Vanglaini chanchinbu February ni 24, 2017 chhuakah khan, NIAS Kolkata-in Mizoram sawrkarah Advocate General kaltlanga cheque 10, Rs 4,20,000 ṭheuh, a vaiin Rs 42,00,000 chu Mizoram sawrkar hnenah an pe let nia Chief Minister-in a sawi thu kan hmu a. Mahse, sum pek let leh let loh chungchang, an pek let zat, pek hun leh in pek dan te, November ni 16, 2017-a Assembly Session-a eptu MLA pakhat zawhna tuna LESDE Minister ni mekin ziaka a chhanna, kartin chhuak chanchinbu pakhat ‘The Frontier Despatch’ in a rawn tarlanah chuan, “NIAS Kolkata-in Mizo zirlaite zir man Mizoram sorkarah a la rawn pe let lo.

Sorkar sum bawm­ah a la lut lo. MoU ang hian zangnadawmna inpek dan (provision) a awm loh avangin zirlai tumah pek an ni lo,” tia a chhan thu kan hmu leh thung si!

Kumin kum tir maiah khan Chief Minister berin an pek let thu chiang takin a sawi a. Tunah a changtu minister-in an pek let leh loh thu leh an inremnaah ziah lan tel a nih loh thu thlengin a sawi leh lawi si!

Eng hi nge dik a, eng hi nge dik lo?

- Zosangliana