World Cup en sawiselna ṭul lo

Tun hnaiah Sports Minister Pu Robert Romawia Royte chu World Cup en turin Qatar lamah a kal a, a nupui nen an kal nghe nghe niin a lang. Chu a kal chu a enga mah finfiahna awm si lovin sorkar suma kal angin an han puh nghal thawr a, amah ngeiin sorkar sum a hman loh thu a sawifiahna kan lo chhiar zui nghal a, a lawmawm khawp mai.

Mizote hi thil finfiah hmasa lova thil sawi mai mai ching kan ni. Patling ni ve lem si, Facebook leh Whats­App lama dawt ringawt sawi ṭhin kan nei tam lutuk hi a pawi a ni.

Miin World Cup enna tur pawisa a nei a, ama duh thuin a zuk en a, kan state pawisa pawh a hmang lo tih a sawifiah ang läwm lawm a, 'mah reng reng se' tih hi kan Mizo patling zia a ni ngai lo.

Thangthar leh chhawng te hian nun dik leh nun tak hi neih an mamawh a, mi tak tak ni ngam ve turin inenfiah an va mamawh tehlul em ve le.

World Cup en kha chu sawisel tur a ni lo chungin sawisel theih a awm a, chu chu International Tourism Mart thlen lai khan kan Tourism Minister bakah Tourism hotupa Secretary (Addl Secretary) kha Qatar lamah an lo zuk daih kha a ni.

Social media post pakhat chuan kan ramah tourism promote tumin nasa takin ṭan kan la a, thil tih lian tham ve tak kan neiin pawisa kan seng nual bawk a ni. Chutihlai mêk chuan kan hotute chu mi ramah tourist an lo zu ni daih mai lawi si lai hi a inhmeh lo ve tlat a, a timing hi a fuh lo deuh hlek chauh a ni. Tourism Minister leh Tourism hotute lai lai an ni ve si a.

Han sawi han sawi takah chuan International Touri­sm Mart-ah khan tourist han tih tur kha an awm mang lo niin an sawi tlai mai.

Lammualah concert ang reng buatsaiha Mizo ṭhalai kal khawm kha kan International Tourism Mart buat­saih hlawhtlin­naah kan ngai dawn a nih chuan Chapchar Kut pawh zan lamah hmang ta law law ila tih ngaihdan a piang nghal a ni.

- R Lalremruata