Beiseiphak lo politician

Pu Lalduhoma an hek thlak hnuah Mizoramah politics thila kan hmuh ngai zen zen loh bye election-ah ruling an tla a. Hei hi kum 2023 hmahruai a nih theih leh theih loah sawi tur kan nei ve lem lo a, kan politician ṭhenkhat beisei phak ta lo hi chu kan sawi ve loh chuan Mizoram tan fa hrin man awm lo tak ka ni dawn si a.

MNF sorkar tirh khan kan beisei a san chhan chu ṭhalai rual, lehkhathiam rual, Master Degree mai bakah PhD nei leh Engineer bakah Doctor te kha an tam ve viau asin.

He MNF sorkar hi kan bih chian ngat chuan Master Degree MLA tam ber ṭum a ni ngei ngei ang a, MNF MLA zingah hian Kohhran Upa an tam ber ṭum pawh a nih a rinawm bawk a ni. Mizorama kan teh dan chuan mithiam leh mi hming ṭha hlang awm khawmna ministry a ni.

Mithiam rual awm khawm chuan an MNLA pui ve tho Pu Lalduhoma kha an han hek thla duh a, inbeihna naran ni loin inphiarrukna tenawm tak tiin history lamah an la sawi zui zel dawn bawk a ni.

Khatia MLA fel tak takten Pu Duhoma an hekna kha kan en let chuan "ZPM takin a khawsa, ZPM ni loin Independent MLA a ni sia dan a bawhchhia," tih a ni.

Khatih lai khan Pu Duhoma kha ZPM ni lo mahse an din khan ZPM Flag, ZPM Symbol leh Poster nen an campaign tih kan la hria a. Chumi hnua ZPM a intih vanga hek kha chu mithiam, kohhran upa leh Mizo tiha mawi lo a ni. Pu Duhoma ni lo zawng ZPM MLA dangte pawh hi hek ve law law se?

Kan ram MLA ṭha ber tura ngaih Kohhran Upa, YMA hruaitu leh MZP hruaitu hlui, Master Degree nei rualte chet dan en hian kum 2023 ah hi chuan MLA hi thlan fimkhur deuh a ngai leh dawn tlat mai. Mi hming ṭha tih vel mai maia teh tawh loh a ṭha zawk ang, beisei an phak lo anih hi.

- Machhandama, Bawngkawn