KRISMAS TIH AWMZIA HI RUAI ṬHEH HUN TIHNA A NI LO THUAI DÂWN?
Krismas hmang ṭhinte zîngah hian, Krismas tih ṭawngkam kan hriat apianga kan rilrua langsar ber hi eng nge ni ṭhin ang le? Naupan lâi kha chuan Krismas tih awmzia chu 'thawmhnaw thar neih hun' tihna kha a ni ber a. Thawmhnaw thar neih loh kha chuan Krismas a ni tlat lo!
Naupan lâi leh tun huna Krismas awmzia kan hriat dân pawh hi a inang lo chho ta ngawt nia. Sum leh pai harsatna avânga thawmhnaw thar kan neih kum tin tâk lem loh hnu phei hi chuan, Krismas ti-Krismas-tu ber chu thawmhnaw thar neih kha a ni ṭhin miau a, a awmzia pawh a danglam phah ta viau mai. Duh hun huna sa hmeh tûr nei lêm lo tân hlei hlei khân Krismas chu 'sa hmeh hun' sawina a ni ngar ngar a. 'Lênkhâwm hun' tih ai mahin, 'Ruai ṭheh hun' tih hi a ni rei khawp mai. Eng chen tak daih ang maw? Covid-19 hun lâi meuh pawh khân, a huhova ruai ṭheh a rem lo chung chungin, a sâ insem zawnga ruai ṭheh hram hram chu Zoram khawvelah hian kan awm nawk kha!
Kan khawsak phung inthlâk ang bawka ei leh in lama kan duh tui tâk mêkah hian, ruai ṭhehnaa kan chawhmeh aia tui zâwk ei tûr kan lo ngah ta a. Mahni in lama kan buaipui peih loh pawhin, siamsa eina hmun tûr lah chu 'hawi harh pahin aw' tia nuam leh changkang tak tak pan tûr a awm ta far mai bawk nên, Krismas awmzia hi ruai ṭheh hun a ni lo chho thuai dâwn tlat!
A nihna takah chuan, Krismas awmzia hi Zoram ṭhalai tam tak tân phei chuan 'NUNKAWNG ṬHA LO TAK, THLUAKA BET HLEN TAWH TÛR' kan zawh ṭan hun a ni ta mêk a. Lei leh vana Lal ber meuh ni si, misualte tâna mahni leh mahni inngaitlawm a, mihringa a lo chan thu lam hi rilruah a leng mawlh tawh lo! Krista Ruai tih lam pawh a lang lo. Mahni 'birthday' leh hlimhlawp lam hlir a nih hi kan tuipui tâk suau suau chu!
Kristian sakhua aia sakhaw upa zâwk fêa chhâl Hindu sakhua (sakhua inti lêm lovin, nun dan kawng 'way of life' an inti zâwk mah) zuitu mi tam tak ten, Pathian biak nâna milem an hman ṭhin chu, Pathian emaw tia be ta zâwk hlauh an awm ang chiah hian, Krismas pawh hi a hmangtu Kristiante zîngah kan hman dân avânga a awmzia a danglam theihzia hi hre nawn ila, Krismas awmzia ni tûra kan duh ber ngaihtuah chunga chutiang lam hawia program kan siam thiam pawh a hun takzet a ni.
Kum 2022-ah hian eng Krismas ber nge kan hman ve dâwn?
- Samuel Dinté, Chennai