2023 Election leh ṭhalai lehkha thiam

Kum a lo thar ang a, kum 2023 kan chuang kai ang a, chu kum chu kum nga dang atana Mizoram chhunga kan hruaitu tur kan thlan kum a lo ni leh dâwn ta reng mai a. Mizo ṭhalaite hian kan ram hruaitu kan thlan danah hian party lam dah ṭhain ngaihtuahna i seng tawh ang u.

Assam nen ramri a buai khan ram hruaitu English-a biak hleihtheih loh neih zahthlak zia kan hmu a, kan lama ṭang turte pawh kan hnar ang tih hlauhawm khawpin kan hruaitute hian English pawh an thiam lo. Ram hruaitu hmasa, kum 70 ral kai chin chu kan hrethiam thei tur a nih laiin, kum 50 pawh tling lo ṭhalai ni si, ram hruaitu ni bawk si, English interview-a thu awmze nei satliah pawh sawi chhuak thei lo chin kha chu hnawl an ngai tawh a ni.

Ramin hma a sawn dâwn chuan hruaitu an pawimawh, tuna kan hruaitute hi kohhrana inhmang, zirlai pawla inhmang ṭhin, YMA vela hruaitu hlui, Sports lama inhmang tihte kan tehna a nih vangin kan ram dinhmun chu hei kan hmuh vek hi. Hruaitu ṭha tehna hi thlàk a hun tawh a, tunlai khawvel ning khawng hre ve chin lo chu ṭhalai level ah hi chuan thlang tawh lo ang u.

Meghalaya Chief Minister leh Arunachal Pradesh Chief Minister te hi kum 50 pawh tling lo, ṭawng thiam si, bright leh changkang an nih avang hian hma an sawn chak tih kan hmu a, keini ramah chuan a party hruaitu upa zual pawh duh khawp lohna a nasat nen, a ṭhalai zingah pawh export tlak loh ringawt thlan tlut tlut hi chu politics kailawna MZP leh YMA hman nghawng ṭha lo tak a ni a, quality awm lo ram hruaitu mi chibai taima tak tak kan nei reih ruih ta a ni. Ṭhalaite kan harh a ngai a ni.

- Lalawmpuia, Bethlehem VT