Aizawl chauh Mizoram a ni lo

Mizoramah hian Aizawl khawpuiin mipui a ngah ber a, sum pawh a hmang hnem ber tih kan hriat rual hian tun hnaia Aizawla sorkar sum senna tam tak hi chu thil ṭul lo leh a loa awm theihna a ni hlawm.

Sorkar sum khawh­ralna, party mite vulhna remchang leh party worker te tham deuh zawkte tih lungawi tumna hna phuahchawp mai mai a ni. A awmzia chu thil ṭul tak ni lem loa pawisa luang ral a tam tih hi kan hriat a ngai.

Congress sorkar lai khan Aizawla Bial pakhat hi chu, "Kawr lian leh kawr te zawng zawng pawh an khuh zo vek e," tiin bialtu MLA thiltihtheihzia an sawi ṭhin a. A ni lah tak a, a ṭul lo thleng thleng hian kan siamin kan hungin kan khun zo a, 'hnathawk' tih hming pu chunga party worker tih lawmna hmanrua a ni. AMC a lo din hnu hian hetiang hi an rawn uar sauh sauh zui hi a pawi lai ber chu a ni.

Thingtlangah an mamawh ngawih ngawih step, tual­chhung inkal­pawhna leh tuiluan kawr vawi khat pawh siam la tawk lo a awm tam laiin Aizawla lui kawr ṭhenkhat chu vawi li vawi nga an khuh ṭhain an hai tawh. 'Minor Works' hi kan politician ten party worker an tih lawm tumna a nih avangin side drain siam, step siam, zun in siam etc etc etc hi an sum hmanna a ni a, pawisa dah khawma thil lian tham din theihna kha an sem sawm mai a.

AMC hian PWD leh UD&PA tih ṭha lo zawng zawng a hma aia uarin an rawn chhunzawm a, Aizawl chu kan chhung bel hlun tawh a, thingtlang chu an ro ta ngawih ngawih a ni.

Aizawl chauh hi Mizoram a ni lo tih hi kan au hla a ni chung pawhin Aizawl bak hma­sawn tir tum lo ang maiin kan sorkar a la inher mup mup tho a. AMC kutah Aizawla Minor Work chin hi chu dah law law tawh ila, tichuan PWD te hi chuan Aizawl pawn lam hi hawi ve deuh tawh se la.

UD&PA pawhin urban area ah hian Aizawl ni lo zel hi tun aiin thuam ve deuh se a ṭha dawn a ni.

- Zothansanga