MIZOṬAWNG A THI MÊK!
Zirna lamah kan kal nasa a, lehkhathiam an tam a, Mizo zawng zawng 90% chu ziak leh chhiar thiam kan lo ni ta a. Class X chung lam ringawt pawh sing engemaw ti zah an awmin, MA, BA sang tel teh meuh hna nghet thawh lai nei lo an awm bawk. Lehkhathiam lamah Mizote hi kan duai tawh lo hle.
Chutih laiin Mizoṭawng hlang hlak a ṭawng thei erawh Mizo ṭhalai zingah an vang ta hle a, Mizovin rawng kan tih hming hrang hrang, a hring, a pawl, a dum, a sen leh a dangte hi sawi thei leh hria hi ṭhalai aṭanga naupang tê thlengin an vang ta pharh mai. English erawh chuan naupang tê pawhin an sawi thei thung.
Kan lo changkang chhova, Telephone, Mobile Phone kan hum ta far mai, mahse kan Phone number hi Mizoṭawnga pakhua, pariat, paruk, pahnih... tia sawi thei chu veng leh khaw khatah hian mi pakhat pawh an awm lo mai thei.
English erawh chuan Nine, eight, six, two.... kan ti zat zat thei hlawm. English a kawi khat pawh sawi thei lo hian phone number chu English lo chuan zuk sawi thiam hauh hlawm lo ia maw le! Mizoṭawng hi (Mizo kan ṭawng chuan MIZO ṬAWNG, English, Hindi tih anga noun a kan sawi chuan MIZOṬAWNG) a bo zo tak ngial dawn e, i harh thar teh ang u.
'Mizo kan awm chhung chuan eng vang mahin kan ṭawng a thi lovang,' ti pawl an awm? Naga ho pawh an la awm reng a, Naga ṭawng aiin Hindi leh Assamese, English an hmang tam ber ta.
USA-ah pawh Negro an tam lutuk, African (ṭawng) an thiam tawh lo, American English chiah an hre tawhin an hmang tawh. Cachari chu an la awm, an ram Cachar khaw daifem velah an khawsa, Bangali vek an hmang tawh.
Mizo ṭhalai awmkhawm hmun tam takah chuan English chu an inkawmna a ni tawh. Hun rei lotê-ah hian Mizo ṭawng tlem tel ve English hi kan tu leh fate hi chuan an rawn hmang tawh ang.
Ralte ho pawh Aizawl khawpuiah a tam ber an ni mahna, Ralte ṭawng thiam an awm bar tawh lo. Mizo awm reng chungin kan ṭawng chu a thi ṭan mêk a nih hi.
- JH Malsawmthanga