Tute nge smuggler thurual pui ṭhin an tihte chu?

Thil inti hre tak leh Mizo pa fing ve pawla ka ngaih chuan, "Myanmar aṭanga kuhva smuggling hi chu tih tawp mai mai theih chi pawh a ni lo. Kuhva smuggler lianah hian MNF, Congress leh ZPM lamah pawh nihna pawimawh tak tak nei an awm thluah tawh. Kum 2018 inthlan dawn khan candidate zingah tu tuin nge kuhva smuggler aṭanga pawisa dawng pawh in hre ve dawn si lo.... hei ai hian rangkachak smuggling hi a la lian zawkin ka ring," a tih ka hriat aṭang khan kan ram dinhmun zel ngaihtuah hian thin a ur tawh a ni.

Mahni thiam dan dan zawngin han au chhuak ve leh ta rawih ila. Assam Rifles Commandant leh rangkachak case kha engtin nge a kal tak zel? Khatah khan chiang fak fakin Mizo hming a lo lang tih kan hmu ṭeuh ang a. Chu mite chu kan va demin kan va sawisel lem lo nangin kha rangkachak smuggling chiahpuam puak keha hming lo langte leh kan ram hruaitu ṭhenkhat insi rial rial lutuk te pawh hian ngaihtuah a ti thui chho zel a, tumah hi kan va inpuh thiang lo a, mihring rilru kal vel erawh hi chu tuma va dan theih pawh a ni bik hek lo.

Champhai District lama smuggler kan tih te hi chuan smuggling hi eizawnna pangngaiah an hmang nghet laklawh tawh a. Drugs leh silai a nih loh chuan inthiam lohna pawh an nei lova, khawtlang hruaitute pawhin kuhva tawlh hi sual a nihna an hriat loh thu an au pui tawh a, in lian ṭha zet zet an sak bakah in hmun rem ṭha ṭha an nei zo tawh a, kuhva tih hma hian khehpuamah khan mi tam tak an lo inla lian hman tawh a ni si a.

Kan kal dan thlir hi chuan MLA inthlan dawn hian pawisa nei deuh te hian candidate zinga tling thei tura an beiseite hi an va 'ṭanpui' ṭhin a, ṭhian ṭha puihna angin a nuai sawm bi telin an vawm hmiah miah tawh a. Chumite chu an tlin chuan a pawisa thawhtute hi an man ngam lo ang tih hi ka kutphah tlukin ka chiang.

Chu chu kan ram kal dan a nih lohna turin zing ṭawngṭai inkhawma kal ṭhinte an ṭawngṭai char char a nih loh chuan kan tlai zo dawn.

- Vanlalliana