KAN RAM DEVELOPMENT CHER LUTUK HI CHU AW

Hman deuh khan Lunglei-ah Lena Sports Stadium kan tlawh a. Khawpui pawn hmun thengthaw nuam takah Stadium ṭha tak, phul lem phah hring dup mai hi a lo awm a, ṭhalaite tan ro hlu tak a ni ang.

Development kan kalpui hi han fak dawn ila, MAHSE tih tur hi zeh tel zel a ngai bawk si! Chu Sports Stadium chu, a panna kawng chhuk chho lutuk leh cher lutuk mawlh mai kha, mipui pun khawm nan a inhmeh thlawt lo. Hei hian kan development ruahmanna hlimthla a ti lang.

Kawng tha mawlh mai hi: Deve­lop­ment kan kalpuinaa kan mamawh hmasa chu kawng zau ṭha neih a nih laiin, a building lam kan dah hmasa tlat zel. Building ṭha tak tak kan sak tawh, a panna kawng mumal leh si lo, hman ṭangkai loh building a awm ṭeuh tawh mai. Kawng a ṭhat chuan in hmun te, ram te, a hlutna a let tam takin a sang ṭhin.

Kan Tourist spot te hi kalkawng cher tak vekin a panna kan siam a. Reiek tlang nise, a panna kawng zim lutuk leh kawng kawi lutuk, motor lian vawi khata a kual zawh lohnate a la awm nual mai. Vantawng khawhthla panna kan siamte lah chu, motor insulpelna awm lo khawpa zim a tam em em. Chalfilh tlang pawh khi a hmun a nawm tehreng nen, a panna kawng bawk kan ngaihthah. Hlimen Park panna te saw, a cher mah mah chu a ni. Tunah phei chuan weekend-ah mi 1000 rualin an pan sup sup tawh mai si a. Hmuifang tlang panna kawng bak, kan tourist spot panna khawng ṭha a la awm lo. Chu pawh chu World Bank road kawng kan hman theih vang chauh a ni.

Kut hnathawktute tana develop­ment innghahna lian ber chu kawng ṭha bawk a ni. Agriculture link road kan neihte hi, fur khaw chhiat laia motor kal theih lohna deuh vek a la ni. Hmanah Bihar a kan kal ṭumin, thingtlang khua kan kal nual hman a, kan hmuh chinah an Agriculture link road chu black top a siam vek a ni. An CM thar Nitish Kumar-a hmalakna a nih thu min hrilh. Hruaitu ṭha hmalakna hi chu a kaw ruih zel mai chu a ni.

Hruaitu ṭha chuan hma an lakin, a ṭha tur, mipuite chhawr tur dik hi an hre bik asin. Kawng ṭha pawimawhna hria hruaitu nei ila, development cher lutuk hi tih thau vin a awm ve mai tur.

Man ṭang ei hi development tichertu: Man ṭang ei bang hmanga development kan kalpui ngar ngar avang hian, kan development hi a cher lo thei a ni lo.

Man ṭang ei hi sualah kan ngai tawh miah lo a ni awm e. Kan hotute ka chhuak ngei aṭangin, contract hralh chhawnte chu tih dan phung ve reng a nih hi, tihte kha hriat tur a awm a, hetiang a nih chuan, hna reng reng a nih dan tur angin a puitling dawn lo tih a chiang. A nih loh dan tur hi a nih dan turah kan ngaih chhung chuan, central sum hi hmasawn nan kan hmang daihzai thei lo chu a nih hi.

Mipui kan thatchhe lo: Thawh man awm a nih phawt chuan, mipuite hi kan thatchhe lo. Hman zan chu Youtube lamah Aizawl thlai bazara mite chet dan an rawn ti lang a, zan dar 12-ah pawh bazaara inpho an che sup sup mai, an thlai hralh turte vengin an tlaivarpui ṭhin a ni awm e.

Pune-ah khuan Market Yard zau pui mai an nei a, zingkarah thingtlang aṭanga thlai rawn phur lut motor 100 rual an lo lut a, hmun leh hma an neih ṭhat avangin, zan riak khawpa thlai zuartute an buai a ngai ve lo.

Kan sabzi bazaar building sak pawh hi mipui kan ti rethei rei ta hle mai. Hmanah Imphal Sabzi bazaar an sak ṭhat dawnin, bazaar-a ṭhu ṭhin nu ho khan, seat an chan tawh loh hlauvin an dodal ngat ngat mai a. Sorkar chuan a hmalakna tih khawtlai a tum lo bur mai, an thawk rum rum a, kum khat chhungin bazaar nalh zet mai an dinsak ruah mai. An district capital Churachanpur NU BAZAR building neih pawh kan ram khawpui ber Barzar building in a tluk lohna a rei ta khawp mai.

Mipui lam hi chu tih kan nuam asin. Phun leh nuar miah lovin, tlaivar ṭhak ṭhakin hna kan thawk a, sorkar lam che muang viau mah se, kan thawk ṭawng ṭawng mai chu a nih hi.

Truck ruak economy: Amah Pu Riawma IRS (Rtd) sawi dan takin, truck ruak economy a khawsa mai kan la ni. Kan ram aṭanga thawn chhuah awm lo, a ruak ngawta truck thawn chhuak ṭhin ni si hian, changkanna kan tehna hi eng nge ni ta le?

Pastor pakhatin, kawng lai company engineer pakhat zawhna a chhanna hi kan ngaihdan a ni ve em? Engineer chuan “Mizote hi an va hausa awm ve, an in leh in chhung bungrua a changkang si, an incheina lah a sang bawk si? a ti a. Ka ṭhianpa chuan, “I hmuh zawng hi a ni mai” a tih khum.

A dik viau lo maw, development hi in ṭha leh khawsakna changkangah kan teh a ni mai em? Vai buhfai, vai tel, Vai dal, Vai puanthan, Vai alu etc. ring hian kan parh hawrh ringawt a. Chhuan tur hi kan ngah lo teh asin.

Development atana central sum kan dawn zozai hi ruahmanna fel tak leh man ṭang ei awm lova hma lak chu nise, kum 36 zet state kan nih hnu hian, hei aia hmel duhawm hi chu, he ram riangte hian a hmu ve tawh ang maw le.

- Lalrinliana Colney