Aizawla kawng chhâwng siam tur thuthlung kha a la awm em?

Kumin kum tir lam khan Vanglaini chanchinbuah Aizawl khawpuiah kawng chhawng fiamna tur inremna an ziah thu ka lo chhiar tawh a. Mahse a rei leh deuh tawh avangin a thawnthu kimchang kha ka hre reng ta lo a, mahse kan Chief Minister hoa an ziah ve meuh a nih si avang khan ka ngaih a lo ṭha nghal viau mai a, hei vawiin thlengin a ban pakhat phun pawh hmuh tur a la awm ta si lo a, ka ringhlel leh ta deuh a ni.

Aizawl khawpuia Bawng­kawn leh Vaivakawna flyover siam tuma ruahmanna awm chung changah khan Mizoram sorkar leh Telecommu-nications Consul­tants India Ltd. ten thawhhona thu­thlung an ziak tih kan lo hmu a, tuna kan Chief Minister Pu Zorama hi a tel ve nghe nghe kha a nia.

Tichuan hei kum a vei leh dawn tawh chu a ni a, mahse MNF sorkar hun tawp lam kan hman mek ta a ni a, an thawm riva hriat tur engmah a awm zui si lo hi engnge a chhan ni ta tih sorkar hian sawi fiah se ka duh a ni.

Mipui hmaah khati taka ropui khan inremna an ziak tih an puang dum dum a, CM hian kawng chhawng (flyover) kan siam dawn tih a sawi fo bawk kha a ni a. Tunah nghah chhuah tur tak tak awm loin thil dangah kan pakai leh ta vel mai mai a, hmana kan hlawhchham pui tawh Mau/ Rua kan tui pui leh ta vel mai mai a. Kawng chhawng lam thu thar a awm zui ta miah lo mai.

Kawng chhawng siam nan khan Mizoram tan pawisa sen pawh ngai lo tur khawpa ruahmanna ṭha kan nei kha a nia, enge kan thlen chin hi le?

Aizawl lirthei tawt leh traffic jam nasa lutuk hi a ninawm zozai tawh a, traffic jam free khawpui siam tumtu MNF sorkar hian an thil tum hi bulṭan loa an tlak san vaih chuan a pawi hle dawn a ni.

Traffic jam hian hun leh tha bakah sum tam tak min khawhral tir a, kan nunphung a tibuai hle bawk a ni. Nakkumah MLA election a ni leh mai dawn a, sorkar leh duh vanga mipui hnenah thu dik lo tiam mai mai a nih phei chuan MNF party mi lo nih ve pawh hi a zahthlak viau dawn a ni.

Tunah hian MNF ka ni mek a, mahse ka active ve hman lem lo a. MNF ka nih chhan pawh ka pute aṭanga ni kal zel kan nih vang a ni a; mahse an thu tiamah an din loh fo chuan party hrim hrim hi chhuahsan ka duh e. Tu party nge ṭha tih lam erawh chu ka hre lo.

- Vohbika Pu