KOHHRANIN RAM A VEI NA SAWT HLE
Khawvel danglam zelah hian tun hmaa kan la tawn ngai loh thil thar a lo awm ve zel a, ram rorelnaah leh Kohhrana rorelnaah pawh thil lo thleng thar mil zela chet lak a ṭul fo reng a ni. Ram roreltute, pawl hrang hrang leh Kohhrana hruaitute thlengin kan hun tawng mil zela rorel dan thiam tura inzir belh zel a pawimawh hle. Hmana thil thleng ngai lo kha vawiinah chuan thil tam tak a thleng thar mek zel a, duhamna leh mahni hmasialnain kan khat a, tangka sum ngainatna bawiah kan tang a. Dan lo hi dan emaw kan ti ta hial niin a lang ta a, Kohhran pawh a mangang ta niin a lang. An ngaimawh point thum chauh hi lo en ta ila:-
1. Tun hnaia Presbyterian Kohhran rorelna sang ber dawttu, Presbytery inkhawmpui rorel thupui (agenda) bial engemaw zatah chuan - Kut tling lova sum lak luh leh a thlawna sum sem leh dawn a tawp theih nan Kohhranin nasa lehzualin hma la rawhse, tih leh he lam hawi chu pass niin Synod rorelnaa ngaihtuah turin a inup mek a, kumin Synod rorelah hian sawi ho a ni ang.
2. Dt.22.11.2022a MPF Annual General Meeting chuan Kum 2023 General Election tur chungchanga chak zawka hma lak dan tur te, an inkaihhruaina bu siam ṭhat a, Kohhran pawl zawng zawng MPFa an tel dan tur te an ngaihtuah a. Chawhnu Session-ah phei chuan "Party ruihchilhnain ram leh mipui a nghawng dan" tih thupui hmangin Rev MS Dawngliana'n thu sawiin an zir ho nghal nghe nghe a. He a thusawi hian ṭha tih a hlawhin sawi zui a hlawh hle a nih kha.
3. Dt.29.11.2022 Vanglaini chanchin bua kan hmuh angin, Mizoram Kohhran Hruaitute Committee (MKHC) chuan Synod Moderator Rev Dr Vanlalnghaka Ralte hova Union Minister John Barla, Aizawla lo kal hnena Kuhva hralhna chungchanga harsatna an lo thlen thu kan hmu leh bawk a ni. Tunlaia kan ram hun tawng mekah hian Pol. party-te in mawhpuhna hrang hrang leh mimal leh pawl ngaihdante kan hre ṭhin a, tunah chuan Kohhran pawhin "aw" an chhuah dan a lo dang ta. Kan ram rorelnaah hian ngaihtuahna thar kan hman a ṭul ta hle niin a lang e.
MKHC hruaituten Union Minister hnena kan rama thar chhuah kuhva hralhna chungchanga harsatna an tawh thu an lo thlen khi a bul thum ngaihtuahin a rilru nat thlak hle. Khaw chhak aṭanga dan lova kuhva lo lutin a nghawng vek a ni a, a hun laiin kan dang si lova kut hna thawktuten harsatna an tawk ta a ni, a pawi khawp mai.
Kan CM leh Assam CM-te pawh kuhva chungchangah hian inbe tawh niawma sawi a awm a, chu mai bakah kan CM pawhin India President lo kal hnenah khan a chin fel dan ngaihtuahpui turin ziakin lehkha a lo theh lut tih a awm bawk a nih kha. Result ṭha hriat tur erawh kan la nei lo a ni awm e. Central sawrkarin dan lova kuhva lo lut titawp tura min tih lawm lawm laia hma la ṭha duh si lo va, a tawpah Central-ah bawk kan zualko leh a nih si chuan mahni mawng hlim, tuhrah seng min ti se engnge kan sawi tak ang le! Mei chu a kan nasat hmaa ṭhelh a nih loh chuan a kan nasat hnuah chuan ṭhelh a har tawh ṭhin tih hi a dik mang e. Sual pawh hi a nasat hma aṭanga thunun a nih loh chuan a nasat hnu chuan thunun rual a ni tawh ṭhin lo. Danin lalna a channa hmun apiangah rorelna a mumal a, mipui an zalen a, ram nuam a lo ni ṭhin.
Kut tling lova sum sem leh dawn pawh hi thil awm ngei a ni tih hi Kohhran ṭhenkhat au aw aṭang hian a chiang hle mai. Synod rorel leh Kohhran pawl hrang hrangte hian Politiciante leh mipuite hi tun aia nasa zawkin "Rinawmna" hi min zirtir teh se. Sum thianghlim lo hi Pathian ram zauh nan leh malsâwmna dawn nan pawh a hmantlak lo a ni tihte hi in zirtir kan mamawh hle a ni. Pol.Party ruihchilhna avanga kan chhia leh ṭha hriatna pawh hmang thei lova min sal beh tlat ṭhinna aṭang hian tal chhuak ila, Pathianin duhthlanna thiang tak min pek hmang tur hian rilru i siam thar teh ang u.
Kohhran hian ram leh hnam ṭhatna tur atan hian tun aia nasa zawkin hma han la zel se, MPF la zawm lo Kohhrante pawhin MPF aṭang hian ram leh hnam siam ṭha turin rawn zawm ve zel thei se a duhawm hle mai. Ram chu Lalpa ta a ni a, a neitu duh dana enkawl hi a Kohhran hote hna a ni si.
- H Lalchhuanliana