MAS-AH I HAW DAWN EM?

“Kar hlaa leng rual duh zawng te in dam lai em ni le?

Krismas ni lawmawm a lo eng leh e;

Chung Pathianin dam ten min veng tawn zel rawh se,

Dam takin aw kan intawn leh hma zawng

Hlimin zai ang che muttui mangṭha”

- Rokunga

Mizote khawvela ni urhsun leh ni bik hunpui tiha chhal ngam, a dawn hnaiha mipuite rilru tiphawklek ṭhin Krismas hi a pui a pang, a chiap a lap, a tar a zurin kan ngaihluin rilru a luah thuk a ni.

Bar thla ka chuan kai tirh vel aṭangin rilruin Krismas rim manin min tuam ṭan a. Lo lam hna an zo fel a, Pawl an tlak tak avanga “Pawltlak thla” kan tih, han chuan kai meuh chuan rilruin R.L Kamlala, Patea, C.Z Huala, Zasiama leh Rokunga hla adt… an lo lang nghal uar uar mai a.

Mas hla hrang hrang an tiri chuah chuah a, hmun hrang hrangah eng mawi chi hrang hrangin an chei mawi a, naupang lam chenin kan rilru a tizauthau a. Office leh hna dang thawkte pawhin he hun hmaa thil tifel tur ruahmanin an hmanhlel bawk ṭhin.

Dawr kaiten he boruak nang turin an thil zawrh tur an chah thleng zut zut a, kum upa te thlengin he ni ropui lo thleng tur urlawkin thawmhnaw thar leh thil thar chi hrang hrang leiin an inkal pel nawk nawk hlawm a, a ropui a ni!

Ṭuantul vangin hmun hrang hrangah kan awm mai thei. Kan seilenna, duh tawka kan tualchaina hmun leh ei in te, thisenin a ṭhanna hmun hi kan ngai lo thei lo. Hmun changkangah ei in changchang tak ei in ṭhin mah ila, kan chenna in riang te hi thinlungah a la bei tlat avangin ngaih a na zual bik ṭhin.

Hmun dangah awm mah ila, he ni ropui Mas lo thleng turah hian mahni khua ngeia zalen taka chhungkhua, laina hnai leh ṭhiante nena hman hi kan chak fo mai. Chu hun chu nghakhlelhin ṭhenkhat ten an hun leh sum leh pai chan huam ṭhak khawpin an khuaa Mas hmang ngei hi an duhthusam a ni ngei ang.

F. Lalpekhluaa hla phuah “Kan khua” tih hla satu Rebecca Lallawmsangi chuan,

Kan khuaah lenrualte nen

Mas lawm turin kan fuan e.

Perhkhuang remin kan zai e,

U-A-MA kan sa e;

Kan lawm e, kan nghahhlelh

dam ten Krismas kan hmang e.

Sikni aiin kan zai e, U-A-MA kan sa e.

tiin tunlai takin a sa zei a.

He hla thua, a hman dan hi hriat thiam har pakhat chu; Aizawl, Electic Venga K.Lawmzuala chuan “U-A-MA kan sa e, a tih hi beng a thlep deuh. U-A-MA hi Krismas tih angin kan hria a, Krismas kan sa ngai lo, Krismas hla kan sa ṭhin” a ti a, a kaihkawp te pawh a ni mahna” tiin a sawi. A ni khawp mai. Tunlai hla phuah tam zawk te hian hla thu awmze hmanga phuah thiam a ṭul ta khawp mai.

U-A-MA tiha an sawi dan chuan “KHB No.81 (19th Reprint, March, 2019) ‘Ringtu zawng zawngte u’ tih hla chang tawp ber zela ‘Amah i lo fak ang u’ hlaa a tonic solfa rem anga sak nawn lehna ‘U, Amah i lo fak ang’ tiha ‘U Amah’ tih hi ‘U-A-Ma’ ti zelin Krismas sawina angin kan hmang hlen ta niin” an sawi.

Eng pawh ni se, he hun ropui lo thleng turah hian mahni khaw ngaih a zual ṭhin a. Lusun chhung ten an rilruah ar bo a zawng ruai a, lung hi a leng ṭhin reng a ni. Kum rei tak in hmu tawh lo te leh hmun hlaa awmten chhungte nena Mas hmanho hi kan chak ṭheuh a. Chhung te pawn min ngai a, kan ngai bawk.

Mahni khua ngeia haw chakin hmelhriat te hnenah “Mas-ah i haw dawn em” tih hi tunlai huna inzawhna a thunawn a ni fo mai.

- Zalianthanga, Tahan