SEM POLICY

Mizoram politics-a a lailum luahtu pakhat, mi ṭhenkhatin ‘sem policy' tia an sawi ṭhin hi mipuiin kan ngaihtuah chian a ṭul. Min tihchhiat theihzia kan sawi ṭhin laiin kan ṭhatna turin a her theih dawn tlatin ka hria.

Nakkum inthlan tur atana inbuatsaihnaah Congress leh MNF te hian ‘sem policy' kan tih sak mai, policy an nei a. Party thar PRISM hian an sawi thar ta niin a lang bawk a. Heng hi kan ram tan a ṭha ang nge a pawi dawn zawk le?

Israel ramah leh ram hma­sawn chak hova an hmasawnna innghahna hi lo neih leh huan siam (agriculture and allied activities) a ni pakhat a. Heng ram hovin an tih danah chuan thei/ thlai chinna emaw ran vulhna tur hmun bik an thliar hrang a. Chumi mil leh a neitu turin an chin/ vulh duh zawng an thlan milin sorkarin contractor ruaiin ram chu an buatsaih fel sak thlap a. Sawngbawl ngai sawngbawlna tur industry bun chilhin a hralhna tur an ruahman fel sa thlap a. Hnathawh theihnaah chuan hnathawktu tur chu ding chhuak ngei tura hna thawk turin an dah lut ṭhin a ni.

Mizoram leh ram ṭhenkhat hmasawn ve thei lo hovah chuan sorkarin mipui hnenah thei/ thlai chin tur emaw ran vulh tur kan thlantir a. Inchhung khur mamawh emaw incheina emaw atana hman zawh tham lek lek pawisa kan sem a. An hnathawh endik sak si lovin pawisa pek tura ruahman tlemte chu hun fan raihin vawi hnih vawi thum pekah kan hmang a. Neih nei sa lote chuan rei lo te atan kan khawsak kan tihsan phah bawk si avangin a hma aia dinhmun ṭha lo zawkah kan din phah ta ṭhin a ni ber mai.

Hei hi ‘sem policy' kan sawi­sel chhan, kan huat chhan leh hetiang aupui party te pawh kan dem ṭhin chhan a ni. Garden Colony, Jhum Control, NLUP, MIP leh NLUP Ṭha Mi kan kalpui tawh te avang hian tuna Congress Party-in NEDP (leh NLUP chhunzawm) an sawi leh MNF-in SEDP an sawi a, thei/ thlai chin leh ranvulh bulṭan tura pawisaa mipui puih an tum thu an sawi pawh a ṭha lo kan tih chhan hi a ni a. Hetiang hmang hian hma kan sawn thei lo tih kan hriat tawh avang leh kan party lianten hetiang kalphung bawk an zawrh leh si avang hian mi tam tak kan hnual a ni.

Hetih lai hian party thar PRISM Party chuan ‘Buh thar leh thlai thar lawmman sem/ pek' an rawn aupui ve ta thung a. Social media-ah phei chuan sawiselna leh zawhna a siam nasa hle. Hei hi ‘sem policy' a ni ve em? tih leh Party liante thu nen enge a danglamna? tih hi ka zawhna leh sawi tum chu a ni.

‘Buh thar leh thlai thar lawmman sem/ pek' an sawiah hian PRISM Party chuan ei leh bara intodelh thuai theih nan kan chawpui ‘buh' thartute hnenah buh thar lawmman, ṭin 1 zelah cheng 100 an pek tur thu leh thlai thlan bikah pawh a thartu hnena lawmman an pek dawn thu an sawi a. Loneitu tan chuan hei hi phur tharna tham niin a lang.

Buh leh thlai thartu hnena lawmman pek a nih dawn chuan party inthliarna a awm thei dawn lo tih a chiang a. Hemi an sawi zawmnaa Israel leh ram changkang chak hova an tih anga hna thawh theihna siam zawh tawha hnathawk tura indah luh an sawi te hian danglamna bik neiin hei hi kawng thar chu a ni mai lo maw? ka ti a ni.

‘Buh thar leh thlai thar lawmman sem/ pek' an sawi hi party lian pahnih Congress leh MNF te economic policy anga ‘sem policy' tih tur chi niin ka hre lo a. Bulṭan tur hnena pawisa pek leh a thartu hnena lawmman atana pawisa pek hi thil inpersan tak, a nghawng tur inletling thawk niin ka hria. He PRISM Policy thar hi kan ram tana dinchhuah theihna a ni hialin ka ring a, party dangte pawh hian a enga mah hma sem ngawt zel tawh loin PRISM-in hnathawktu hnathawh lawmpuina atana pawisa pek an tum ang chi zawk hi ram hmasawnna tur chu a ni zawk e.

- Lalchhandama, Tuirial