I chaklohna i hria em?
Mihring te hi mi inang lo tak tak kan ni a. Tuna kan sawi tum tak erawh chu natna chikhat thih pui khawp natna ni si lo; mahse, he natna hi kan vei tawh a nih chuan min thlah mai mai tawh ngai lo.
Damdawi ei a han tih chiam chi lah a ni hek lo, doctor rawn buai pawh a ngai lutuk lo. Mahni a chinfel theih a ni a, chutih rual erawh chuan mahni a, kan chingfel dawn a nih chuan beih fe a ngai thung. Chu natna chu ‘tlai’ hi a ni
Han ngaihtuah vang vang la, rual khat zingah, hnatlan nikhuaah, office kalnaah, inkhawmnaah te i a tlai pawlah i
ṭang ṭhin em? I lo ṭang ṭhin a nih ngat chuan ‘tlai’ natna i vei a ni. He natna vei ṭhinte chu mahni invawng
ṭha peih lo, hun vawn dik lama fail an ni duh khawp mai.
Kan ṭhiannu pakhat chu Pathian ni tuk inkhawm ṭan dar rik dawn hian ek chhuak natna a vei tlat mai a, chu chuan a nun pawh a tibuai hle. A ek chhuak chauh kha buaina a ni lo, biak ina chanvo a neih changin ṭan dar a rik dawnah pawh a hmel hmuh tur a awm loh chang a awm fo. Tun thleng hian thil tihhonaah a tlai pawlah a ṭang a. Hetiang tlai reng natna hi a hluahawm khawp mai.
Thil tih ho hleka tlai ṭhin te hi an natna vei, tlai a nih thu kan sawi tawh a, chu natna chuan a vei ve lo te pawh a tihbuai theihzia chu a tlai ngai lote zawt ula an hre chiang ber mai awm e. Thufing chuan 'Tum chuan kawng a awm' a ti a. He thufing ti hlawhtling theitu chu a tlai ṭhinte hi an ni. Tlai natna an vei hi tihreh tumin hma han la tak tak sela chuan an thei em em ang, an tlai ziah hian a tlai ngai lote thlengin an buai ve
ṭhin a ni tih hi an hre miah lo lehnghal.
He natna veiten an vei tih an inhre miah lo te hi an khawngaihthlak. Mi pangngai angin lang mah se, an pangngai zan lohna chu an natna vei hi a ni tlat. Hetiang tlai reng natna vei te hi, an rilruah tum na sang tak a awm mawh khawp mai.
Ṭhiante zinga tlai reng, khawi ilo kal chhuahna apianga nghah ngai reng ilo ni ve reng lo maw? Hetiang kan sawi zawng zawng hi i nihna a nih chuan, insiam ṭhat i ngai a ni. Nangmah chauh i buai lo, i thurual pui, i hnathawh puite thlengin an buai vek. Tlai natna hi sum seng lova tihdam theih natna tlemte zinga mi a ni.
Kan chaklohna pawh hre lo, inti changkang si, a chhuak thar apiang hre viau si kan nih chuan, changkan dan ṭha lo ber a ni ang. Mi dang pawhin an theih chuan eng vangin nge a hun taka thlen te, mi dangte nghaktu nih te i theih loh tehlul ang le... Tunah khan eng dinhmunah nge i din? I chak lohna i hri em?
- Ramchhana Hmar, Phuaibuang