Krismas - mitin tan

Mizotena kan nghahfak Krismas chu kan lo thleng leh dawn ta a, kan vannei hle mai. Kum hnih ngawt mai chu hripui leng avangin kan hmang mumal thei lo tawh a, tun ṭumah erawh hmang mumal thei tawh turah in ngai ila. Eng emaw chang chuan Krismas kan hmuh dan hi fuh lo deuh lai chu a awm emaw ni chu aw,a tih theih. A huau huauna lam hian kan ngaihtuahna tam zawk a luah ṭhin ni te hian ka hre ṭhin. A nihna tak ngaihtuah chuan Krismas chu sakhaw thil, khunkhan taka hman tur ni awm tak a ni.

Krismas dawnah kan neih zawng zawngin bazar-te kan kal a, kan inbuatsaih nasa ṭhin. Hetih lai hian engnge krismas chu ni ta ber hre chiang mang lo hian a awm ve theih. An hrilhfiahna pakhatah chuan, 'Krista ruai' tihna, an ti. Krismas chu Isua birthday, ti ila, a dik ve viau awm e. Bible-a kan hmuh dan chuan, khawvel suala tlu tawh chhan chhuak leh tura Pathian fapa mihring anga alo pian ni, a ni ber.

Han ngaihtuah chian neuh neuh chuan lawmna ni a ni - kristiante tan chuan ni thianghlim a nih ber mai chu.

Krismas hi tute nge hmang hmasa ber le, Mizoramah chuan Zosap missionary-te khan 1900 vel lai khan an lo hmang ve tawh a. Krismas hmasa kan hmuh theih te chu, berampute kha an ni a, a dawt lehah chuan khawchhak mifing pathumte kha an ni leh; a pathumnaah chuan lal Heroda pawh kha a ni ve tho mai.

Eng tikah nge krismas hmasa ber i hman le, ila piangthar lo a nih chuan eng tikah nge Krismas hmasa ber i hman dawn le? Krismas hmasa ber hmang thei turin Bible chhiar la, ṭawngṭai mai rawh.

Krismas chu mi zawng zawng tan a ni. Kum upa lam tawh leh nu leh pa tan chuan ngaiah kan lo nei tawh a, eng he huah kan ngai tawh lo. Damlo na tak tak te pawn an hmang chak lutuk lo mai thei bawk. Tar kun khup biha dam te pawn an hmang chak lutuk tawh lo mai thei e.

He chanchin ṭha hi mitin tan a ni tlat mai, chuvang chuan, keini phur ve vak lo te pawh i hlim ang u, khawvela beisei tur nei em em tawh lote pawh i hlim ang.Damlote pawh i hlim phawt mai ang, chhandamtu pianni a ni a, kan tan hlei hlei a pawimawh a ni. Lusun khawhar zawng zawngte pawh min huap vek a nia. Mi lungngai, in dawmkun mekte pawh i hlim ang.

Ni tih tham a awm tawh lo kan hnaih tawh hle mai. Kan inbuatsaihnate a kim em, thlarau lam inbuatsaihna hi a pawimawh a, kan lo hmaih palh hlauh ang e. Hlawk taka hmang thei turin i inbuatsaih ang u.

Ṭhalai lamte tan chuan Krismas thilpek atan thisen han donate-te pawh a remchang viau ang. Hetih hun lai hian damdawiin ten harsatna an tawk fo ṭhin a nia. Awle, Krismas 2022 chu kan hmang tluang thei dawn a ang ta hle mai a, hlim taka hman a, thianghlim taka hman hi a neitu duh dan a ni e.

- Lalchhandama Colney