Arṭahkawn to Chekawn kawng siam nan Vaibelchhe 7.09 dah a ni, a hun hriat a ni lo! (Online RTI hmang ṭangkai zel ang aw)

Kan hnathawhna avâng hian Mizoram khaw hrang hrang ka zin ve fo a, kan hriat angin kawng ṭha leh ṭha lo innawm hleihzia a lang chiang hle ṭhin. Hrangturzo bial, kan chhuahna lam bialah pawh ka kal fo a, ninawm tak chu Arṭahkawn leh Chekawn inkar kawng chhia hi a ni.

RTI Act hmangin (online) Hrangturzo bial kawng siam dan tur hi ka zawt leh ta a. SPIO PWD, Serchhip Division, Serchhip in min chhân dân chuan, Chekawn to Arṭahkawn kawng siam tumna a awm thu te, Sanction hmuh veleh khawih ṭan tum a nih thu te, Pawisa hi 7.09 crore dah a nih thu leh Contractor erawh thlan a la nih loh thuin min chhang a.

Hei hi, helai kawng zawh ṭhin mi tam tak tan chuan thu lawmawm tak a ni a, sanction hun erawh kan nghah a ngai dawn a ni. A tak ram beisei ang.

Helai kawng bâk­ah hian, hemi bial chhunga kawng dangte hi siam tum nia sawi a awm avângin ka zâwt nual bawk a, chungte chu : Chekawn to Keitum inkar te, Chekawn to N Vanlaiphai inkar te, E Lungdar to Biate inkar kawngte a ni a. Heng kawngte erawh siam tumna a awm loh thuin min chhang thung a ni.

Online hmanga RTI a ka zawhna hi, PWD, Chief Engineer, Roads-ah November ni 7, 2022 ah ka thawn a, SPIO Serchhip Division PWD hnen­ah an thawn nghal a, November ni 9, 2022 ah SPIO hian ka zawhna min rawn chhang nghal a ni. Online hmanga zawhna ṭha taka PWD lamin an chhang nghal thuai hi a lawmawm hle.

He thu puangzar paha sawi ka duh chu, online hmanga RTI dan hman theiha a awm hnu hi chuan, mi tute pawhin mahni bial chhung leh khuaa hmasawnna hnathawh chi hrang hrang hi mahni in lum aṭangin kan dil ve zung zung thei tawh tihna a ni.

Online RTI hmanga hmalakna a awm hma kha chuan, office-ah thehluh a ngai a, a hautak châng pawh a tam ve hle. Mipuiin kan dikna chanvo kan hriat zung zung theih nan, online RTI hi hmang ṭangkai zel teh ang u. Hrangturzo bial mipui leh Mizo mipuiin kan kawng zawh ṭhin pawimawh tak siam ṭhat a nih hun hi nghakhlel takin kan lo thlir nghal dawn e.

- Lalnunṭawma Fanai