Tunlai Politics-a Pastor pension-te inpuanna
“Aw Lalpa, ropuina te, thiltihtheihna te, chawimawina te, hnehna te, lalna te hi i ta a ni a; lei leh vana awm zawng zawng hi i ta a ni si a; aw Lalpa, ram chu i ta a ni”
(I Chron 29:11)
Zoram Democratic Front-ah hian Pastor Pension engemawzat kan awm ve a, Ṭangrual Pawl-ah hian kan tel ve a. Ram Politics-a tim deuh chung chunga loh theih lohna nia kan hriat avanga kan telna hi a chhan han insawifiah ṭulin kan hria.
Thuthlung Hlui-ah hian Pathianin ram leh hnam chunga rorelna hi a ngai pawimawh a, rorelna tha a duh a, rorelna ṭha lo chu a haw em em reng a. Lal rorelna pawh chu a lo ṭhat theih nan zawlneite hmangin a vil reng thu kan hmu. Lal leh milian hoten mi retheite rapbet a, an chanai hui a, in ṭha pui pui sa a, inti lal taka nuam an chente hi Pathian huatzawng tak a ni. Kan Lal Isua pawh khan vanram kaina chauh min zirtir lo. Pathian mite chu he khawvelah mite tan chi anga al a, eng anga eng chhuak tur leh mihring huho nun vawng ṭha a, tinuamtu tur kan nih hi min zirtir dan a ni.
Mizoram han thlir ila state puitling nihna nena kum 30 zet mahnia ro kan inrel chhung hian mipui sawrkar dik tak kan lo nei hauh lo. Ruling party mite bik hamṭhatna a la ni zel a, chu chuan hleihluak taka induhsak bikna a rawn hring a, chu chu corruption nasa taka siamtu a ni. Corruption avangin kan ram hmasawnna tur hi nasa takin a ṭhuanawp ta. Heng hun chhung hian kan ram thawh chhuah ve tia sawi tur thil hlawm lian deuh, hmasawnna rahbi ngheta inhlan kaina engmah kan nei lo va.
Mi rethei chu eichawp dap dinhmunah kan la ding reng a ni. Mi taima apiangin tha thlawn an seng tam ni mai anga a awm ṭhin avangin, hnathawktute tha a na a, kan inthlah dul tulh tulh bawk.
Hei hian kan moral nasa takin min tihchhiat sak a, ruling party bela tha sen phu lova tam pawisa hmuh tum te, a thlawna dawn lo beisei hrim hrimna te a hring ta a ni. Inthlan vuakvetah phei chuan dan bawhchhiaa vote lei tumte hnenah nawhchizuarte ang hrimin kan hlutna, kan thianghlimna leh kan zahawmnate pawh hralh hnial lo kan tam tate hian rilru a tina ngawih ngawih chu a nih hi.
Sawrkarin zu zawrh a rel a, Kohhran chu phalnaa zu zawrh a nih lohna turin kan ṭawngṭai rual a; zu chu zawrh a ni ta tho mai. Kohhranho ṭawngṭai chhanna chu zu zawrh a ni titu chu kan sorkar hruaitu zinga mi a ni a, pakhat phei chuan zu chu pulpit thusawi huaina atan a ṭhat a rin thu a lo sawi bawk a, a bak ṭawngkam dengkhawng tak tak pawh a la awm.
Hengte leh thil ṭha lo dang tam takte avang hian ram siam ṭha tur chuan Kohhran program chhunga rawngbawlna bakah Pathian duhzawnga ram siam hi kan tih tur niin kan hria a, tun dunhmunah chuan “Kalphung thar- Mipui sawrkar” dik tak din tumtu ZPM-a tel ve hi Pathian tana kan mawhphurhna, kan ‘mission’ hna thawhna tur hmun niin kan hria. Rorelna ṭha siam tumte chu rorelna siam thei awm party lian saa tel awm tak min tithei ang.
Mahse party lian sate hian kalphung nghet an lo nei sa tawh a, kan ti danglam thei dawn lo tih a chiang sa. Ṭangrual pawlah hi chuan a lungphumna aṭangin kan tel ve a ni. He Ṭangrual pawl hian sawrkar a siam thei anih ngai chuan duhthusam kan tlin thei lo deuh a nih pawhin, kalpung thar ṭha zawk, sang tak chu a awm theih hrim hrim kan ring.
Keiniho hi chuan mipui sawrkar lo ding thei pawh ni se, nihna leh chanvo nei turah kan inngai lo. Kan hmathlir pawh vana miten Pathian duhzawng an ti angin, Zoramah hian Pathian duhzawnga rorelna tha, mipuite nasa taka min chawikangtu lo awm se tih hi a ni. Kan Pastor pension puite, keini aia ṭhalai zawkte pawh Nehemia anga ram leh hnam vei, duhamna lama Kohhranho tihmingchhe lo tur, rorelnaah pawh mi ṭangkai thei tur lo chhuak zel ula.
Zoram hi Lalpa leh Krista lalna ram atana buatsaih hna thawk tur leh Pathian hminga ram tana chhiahhlawh hna thawk tur lo tel zel thei se tih hi kan duh dan a ni e.
- Rev. Darchungnunga, Chairman
- Rev. Dr. V.Kapenga Secretary