Inkhawmpui leh ruaiṭheh season

December - January chho hi Mizo­te ei leh ina kan insenso hunlai, thawm­hnaw lama kan insenso hunlai, a chhung chhunga puk chawp pawh hnial lova kan insenso hun a ni a, tun ṭum chu in­khawmpui senso lam­pang tun hma deuha sawi hlawh tak kha sawi ve leh teh ang.

Hei kohhran in­khawmpui hi kohhran hrang hi inel lovin kohhran thuhmun ni si, inkhawmpui lian thlengte hi an inel a, hei hi pawm lo eng ang mahse thil nihna tak a ni bawk si. Tunlaia an buaipui ber chu ‘hneh taka thlen’ leh ei leh in inpek tui siak a ni. Pathian tana ṭha ber duhna rilru hi chu a ṭhat viau rualin chumi aia pawn lam lang theia inelna hi a lian ta lutuk.

Mizoram in­khawm­puia thingpui hmeh tuina ber leh senso sanna ber chu Synod Inkhawmpui hi a ni e, an ti mauh mai. Mi harsa ve te te thawhlawm thawhkhawm tling khawm kha an hmang ve tho awm si a, ei leh in tuihnai awm tawk hi chu kan hrethiam tlang a, mi hausa deuh chin pawhin an ei zen zen loh, puar hnawkna tham Aizawla chhang changkang hlir pathum pali kan han chhawp ruih mai ṭhin hi chu kan intlan­siakna holam mai mai a niin ka hria.

Kum a thar ang a, KṬP leh Kohhran Hmeichhia etc lamin Bial inkhawmpui an han nei chho leh ang a, heng hunahte hian ei leh in hi a tawk chin thiam a ṭha khawp mai. Pastor Bial ṭhenkhat chuan rorel nia ruai siamte hi an titawp tawh e an tia, hengte pawh hi a ṭhat zawkna chin a awm thei awm e.

Kan ramah hian inkhawmpui hi kan la kalpui zel dawn a, a hautak lo thei ang, a ṭha leh changkang tak ni si hian a tih theih ngei ang. Tunah hi chuan lang theia kan intlan siak avang hian Synod Inkhawmpui ngat phei chu kohhran Biak In 10 velah an nghat kual chho mek a, midang tana thlen huphurhawm a ni ṭan tawh niin an sawi a, Biak In lamin a dawl zawh loh vangte pawh chu a ni thei tho ang.

Krismas ruaite pawh hi a awm tawk hi kan hriatthiam a ṭha tawh a, tun hma anga sa ei khata sa rawp kha khawpuiah chuan an tam tawh lova, ei sen loh sa chhawp hnur, bang tam em em mai, a tuk lawka a thlawna sem kual mai mai leh man tlawm zawka sem zawh leh tur ai chuan a item hi a awm tawka tihtlem thiam a hun tawhin a lang.

Inkhawmpui tihte, kohhran thil reng reng chu krismas ruai item thleng hian committee-a rel a ni a, pawn lam mite sawi thiang ve lo nimahse kohhran member nih ve ṭek ṭek chuan kan sawi ve theihna platform hi kan chuh vat mai ang chu. Martin Luther pawh khan a platform neih loh kha au chhuah ṭhulh phahna atan a hmang chuang lo.

- V.L. Remruata Khiangte