Mizoram chet chhiatna sports

Hmanni lawka an zawh tak, North East Olympic Games kha kan la hre hlawm ang a. Kha intawhkhawmnaah khan a pumpuiah Mizoram chu 6-na kan ni. A awmzia chu India ram pum pawh ni lo, North East state (India hmarchhak state) pariat zingah a tichhe ber 3-na kan ni tihna a ni.

Hei hian thil tam tak sawi a nei a, chu chu Mizoram sorkar tan pawh thil pawi tak a nih bakah a zahthlak tel nghal bawk a ni. Mipuite pawh kan bang chuang lo, heti tak hian infiamna kan buaipuiin kan at chilh a, sum pawh kan seng nasa viau a nih hi.

Grass lem kan phah vak vak a, boxing, judo, wrest­ling, football thlengin kan tuipui ve viau a, chutih laiin heti zat infiamna chi hrang hrang kan buaipui chunga NE ah 6-na kan han la ni chauh mai hian a lo thlawna kan sum sen zozai hian sawngsawhlawtna a neih lohzia a lantir a, kan sorkar ngei pawh a fail let der a ni tih a rawn pho lang chiang hle mai.

India hmarchhak-ah State pariat awmin kan chungah state 5 zet an awm a, sport heti taka kan atchilh chung hian kan thleng tawi viau tih a lang.

Mizoram hian gold 15, silver 30 leh bronze 60 lain hma chu kan sawn angin a lang ve phawt a, mahse hmarchhak State dangte result enin keini aiin hma an sawn zawk ta si a. Chuti a nih chuan hmasawn ro ro ah kan hmasawnna hian awmzia a nei thui lo a, kan NE state puite hnungah zel kan la kal tihna a ni.

Hmannia Guwa­hati a an khelh zawk tak North East Olympic Games kha NE huap infiamna a ni a, India ram pum huap phei chu ni se kan dinhmun hi a sitawm lehzual dawn tihna a ni. Tun hma deuh te pawh khan Karate ah te hian medal kan la thei em em ṭhin kha a ni a, tun hma lama kan Karate player te medal rawn hum haw ṭhinna zaozai te kha eng tournament tak nge maw ni dawn ta ni? Tuna taka heti taka kan chet chhiat leh si chhan te hi, eng tournament nge ni thin hlawm aw, tour­nament lem lemah kan lo che ṭha viau zel zawk nge ni dawn?

Hetihlai hian Sports displine dang­ah pawh eng kan ang lo tih a lang chiang viau mai. Football ah khan kan champion a, football bikah hi chuan tun hma deuh pawhin kan thleng sang ve ṭhin viau a, eizawn nana hmang pawh kan ṭhahnem ve ta khawp mai a, kan ti ṭha thawkhatah a ngaih theih.

Mizoram chet ṭhatna ber chu Boxing niin gold medal 5 an la a, Table tennis-ah gold 4, taekwondo-ah gold 3 kan dawng ve bawk a, eizawn nana hman thama sports luh chilh hi tum ang u. Kan sulhnu en hian kan sum sen leh kan result a inpersan mah mah a ni e.

Sports hi sum siamna atana hman chi a ni lo a, mimal pawhin kan tui zawng kan thlan thiam a ngai a, nu leh pate pawhin kal zelna tur kawng dik a ni em tih kan fate kan en pui thiam a ngai e.

- Pekhlua Fanai