AMC-in kawngpui a ti zim

Aizawl Municipal Council chuan tunlai hian Upper Bazar leh Zarkawt-Chanmari inkarah mihring kea kalna (footpath) siam hna a thawk mek a, kawngpui a zim tawh si a, footpath an han siam leh bawk si a, footpath siam lohna lama lirthei parking a la awm tho bawk si a, lirthei khalhtute tan harsatna a siam nasa hle a ni.

AMC hnathawh hi sawisel ngawr ngawr ka ni lo a, mah se mahni party mi duhsakna atana rem leh rem loa footpath hi siam an ang ka ti ṭhin. Chu ngaihdan chu keimah mai ka ni lo a, mi tam tak ngaihdan pawh a ni. Kea kalna siam chu a pawimawh khawp mai, mahse a siamna hmun hian a zir em? Kea kalte tan a pawimawh viau pawh nise lirthei tawt tawh lotukah kawng tizim zawnga hmalak hi a dik ber em aw, ka ti deuh.

Sum tam tak sengin AR canteen bulah fly over siam a ni a, mi tam takin zawh mah se kawngpui kan tum tam zawkin an la hmang ṭangkai lutuk lo niin a lang. Bazar Bungkawna an siam erawh chu kawngpui kanna tur an pin vangin zawh loh theih loh a ni a, hei erawh a ṭangkai khawp mai.

Upper Bazar aṭanga Dawrpui phei bus stand bul vela chhuak turte hian fly over ṭha tawk siam nise a ṭangkai ngawt ang.

Helai step chhuk/ chho hi a zawhtu an tam em em a, a chhuk/ chho ropui si, a zim em em mai bawk si a, helai hi chu fly over siam theih nise a lawmawm ngawt ang.

A hmaa kan sawi tak Upper Bazar hospital road-a footpath siam hi a ṭha tho a, mahse kawng­pui chu a ti zim phah viau mai. Hetia siam a nih rau rau chuan hospital zawna two wheelers parking hi nuai bo ngei a ṭulin a lang. Lirthei ke pali nei a tlan a, a sirah ding lamah two wheelers ten an tlan pel ve bawk ṭhin kha tunah chuan an in tlanpel thei ta mang lo a, traffic pawh a ti jam duh viau a ni.

Chuvangin AMC pawh hi sum lakluh lamah duham em em lo se, kan sawi lai hospital zawn kawng chhak lama two wheeler parking hi titawp ngam mai se. Kea kalna tura footpath an siam hi a ṭha thlawt a, ruahmanna ṭha tak a ni. Chutih rual chuan lirthei chet vel harsa khawpa kawngpui nek a, harsatna pum­pelh theih pumpelh tum si loh chu a ṭha ber thei lo.

- Lalhmingliana