Engtikah nge sawrkar tel lova kan inkhawmpui ngam ang?

Intodelh pawi­mawhzia min zirtir laia intodelh hauh lo va inkhawmpui buatsaih ṭhin Kristian kan ni a. Sawrkar ṭha nei tura kan mawh­­phurhna min zir­tir laiin sawrkar bud­get-a awm hauh lo sum pawtpeng ngam khawpa huaisar Kris­tian kan ni bawk.

Dikna leh mahni intodelh thlawp tlattu Pathian thu min zirtir laiin sawrkar hnen aṭanga contract hmanga inkhawmpui senso tuak ngam Kristian kan ni leh zel a. In­khawmpui budget piah lamah Kohhran budget duan laia sawrkar tum ve tur budget-a telh ching Kristian kan ni leh zel a nih hi.

Kristianna a la naupan a, kan hnam rilru a la thianghlim tak tak lai kha chuan kan biak in sak reng rengte kha kan phak ang tawkin sa mah ila, a nih ang ang khan kan hlut ngawih ngawih ṭhin. Eng hun lai aṭang khan nge ni tehreng a, biak in ropui tak tak, pûk chawpa sakah kan inel ta chiam chiam mai a!

Tun hma huna mahni thawh chhuah liau liaua biak in kan sak ṭhin laia hnatlante kha a nawm ṭhin nen tunah chuan vai kutah kan pa pêk tawp mai a. Ropui leh hausa anga lan châkna chuan biak in mai ni lovin kan inkhawmpui thlengin a nghawng zui ta zel a. Tu pandal sak nge lian a, ropui zawk tiin bawlhhlawh takin kan inel ta a nih hi.

Pathian ai chuan lei lam thiltihtheihna chu ring zawkin kan Pathian biak hi kan hmu tê tulh tulh a. Sawrkar puihna tel loa inkhawmpui lian buatsaih ngam kohhran pawh kan awm ta lo!

Kohhran inrelbawl nân leh missionary chawm nân sumte chu a ngai alawm, tiin kohhran thlavang kan hauh ṭhin. A dik alawm, mahse kohhran inrelbawlna erawh a nuamsain a ropui tulh tulh a ni zawk a. A ṭulna aiin kohhran dangin an neih ang neih ve châknain min nawr nâ tawh zawk a nih hi.

Kohhran hi Isua thisena din a nih avangin a zahawm a. Nimahsela, kohhran kalphung erawh hun laihawl Roman Catholic ang maiin a chakin sum a ngah tual tual a, a landan maiah pawh Catholic ang maiin a ropui tual tual a nih hi. Thil a titheiin sawrkar pawhin a mamawh phuhruk loh hlauin budget-a awm lo pui pawisa pawh kohhran tân a theh chhuak lo ngam ngai lo a nih tak hi.

Mihring takin a ni, kohhran tân hian ṭha­hnem kan ngai tawh a. Mihring takin a ni kan inkhawmpui ṭhin ni. Hengte avang hian mi tin kan chhe ta vek e, kan ti hauh lo. Lansarh duhna leh mihring ṭhahnem ngaihna kaltlanga rawngbawl mi te zawk zingah Pathian be ngai lo, inkhawmpui ni pawha zing ṭawngṭaina lama Pathian be tura lang ngai lo, a huhoa in­khawmah erawh a ṭawngṭai ring ring, a lam peih peih ho hian Pathian mi te hi an tam hneh ta lulai êm a ni, kan ti mai a ni e.

- Liana Pachuau