KRISMAS BAZAR LEH ROAD SAFETY

Kum 2017 De­cem­ber thla a rawn inher chhuah meuh chuan cable TV leh khualzin phur motor hrang hrangah krismas hla hrang hrang kan ngaithla leh ta rawih rawih mai. Krismas bazar turin zawl khawpui kan pan khawm leh ṭan ta.

Phur taka bazar kal lam leh haw lam te, ngaihngam taka kawng sira kal, ṭhu, dawr nghak leh ual­au taka kawngpui mawngtam poh khuma kawng kama thil leitute, hmeithai in tia tia thawmhnaw leh eichawp phur luk luk mai te leh mi hrang hrangte Masi bazar-in fanghmir bu thai darh ang maiin kan khawsa ni leng a. Kan lawm chhan ber chhandamtu theih­nghilh ṭhak khawpa Krismas bazar a kan in pangpui zial mup mup zet hi zawng kan Mizo society-ah Masi ti Masi-tu a va han ni chiang kher em ve aw!

He tihlai hian Road Safety lama kan fimkhur tawk loh avanga krismas vuakveta lirthei chesuala kum tin nunna hlu tak kan hloh mai bakah hliampui kan tuar ṭhin te hi a pawi tak zet a ni. Hun lo tak leh rapthlak taka thihna thlentu motor accident hian naupang pawi sawi lo tam tak fahrahah a siam tawh a, a siam mek bawk a, an hma lam hun chhun eng thei hlawhtlinna ni eng zun zam chhum angin a hliah bo kum khua thei ṭhin.

Tin, Aizawl khaw­puiah pawh nun­phung khaihlak khawpin traffic a zam a, traffic ti jam thei khawpin motor kan nei ta rau rau, motor accident kan duh lo tak zet a nih chuan BPL job card nei

aṭanga VIP card nei thleng kan ṭanrual a ngai niin a lang ta. A bik takin ṭhalai 2 wheeler khalhtute fimkhur ang u.

Aw le, krismas vuak vet laia motor accident laka Zoram mipui kan him tlan nan leh krismas damtlang taka kan hman theih nan safety culture hi kan nitin chhuahvahnaah kan nunpui a ṭul ta hle mai. Sorkar thupek a innghat ringawt lovin, nu leh pa ten maihni in lum ngei-ah kan fate road safety lam zirtir lamah theihtawp chhuah tlang zel ang u khai.

- Chhungpuia Renthlei