Police Kuhva man tawh sa bag 1302 a bo
Police thuchhuah : Mizoram Police chuan dan lova Myanmar aṭanga kuhva rah tawlh chungchangah thuchhuah siamin he dan bawhchhiatna hi titawp vek turin Sorkar, Police leh Vantlang tlawmngai pawl hrang hrangte thawkho a hma an lak mek thu sawiin District hrang hranga kuhva rah an man tawh zat leh case an siam sak tawh zatte an tarlang tel bawk a ni.
Chhân loh aiin Paula : Dan lova rawn lut Kuhva hi YMA leh DC, Police te man sa zawng zawng hi Mizoram pumpuiah bag 4522 angin Police chuan report-ah an tarlang a. Mi engzat ta nge an man sak hriat a ni lo. Heng kuhva rah te hi District 8 aṭanga an man belh khawm a ni a, District 3, Lunglei, Siaha leh Lawngtlai ah te man a awm lo. Heti chung hian Kolasib District ah mi 7 manin case an siam sak chu 5 an ni. Hnahthiala pakhat manin case an siam sak lo thung.
Kuhva rah man hnuhnung ber hi November ni 17, 2022 khan Kawrthahah man a ni a. Chu pawh Case an la siam sak chuang lo. Police te thuchhuahin a tarlan danin District tina DC ten an District chhungah kuhva phurh phal loh a nih thu thuchhuah an siam vek niin an sawi a. Heti chung hian District 6 ah mi engemaw zat dan bawhchhia te kuhva an man sak chunga Police ten dan lova kuhva tawlhtu tumah an man lo leh Case an siam sak chuang lo hi a makin Police te hian a hming mai chauhin em ni dan lova kuhva tawlh hi an do?
Police kuta awm Kuhva Bag a bo thei : Mamit District bikah August ni 10, 2022 khan Mamit District Magistrate chuan Mamit District chhung khawiah mah dan ang ni lova kuhva lakluh leh phurh phal a ni loh thuin thuchhuah a siam a. Hemi hnuah vawi tam tak Kuhva rah hi man a ni tawh a. Hmun ṭhenkhatah Kuhva phur motor leh a escord-tu Scorpio Car te tlanchhiat san a ni tawh bawk.
Heti chunga Mamit District chhunga kuhva tawlha inhnamhnawih man an nei lo leh case pakhatmah an siam sak lo hi a thil mak tak a ni. Hei aia thil mak zawk chu September ni 26, 2022 khan Mamit District Magistrate hovin Police leh YMA te hriatpuina in Kanhmun leh Luimawia Godown 6, Myanmar kuhva dahna chu kalh a ni a. Heng Godown 6 ah te hian Kuhva bag 2377 a awm thu ziak meuha record a nih bakah red-mark hmangin Police ten an chhinchhiah vek a ni.
November ni 19, 2022 khan LPS Special Report nei tura Pu Vanneihthanga Vanchhawng a kal ṭum khan Godown an fannaah Godown an kalh chhunga mi kuhva enge maw zat a bo tih chu Pu Vanneihthanga te leh YMA, Kuhva chingtu pawlten an hmu chhuak.
Thil mak chhui sen loh : Heti chung hian Police ten an chhinchhiah fel vek tawh leh District Magistrate-in a kalh hnan chhunga Kuhva chu ruk bo a nih hnuah pawh kuhva ru chhuaktu chhui zuina awm miah lo hi thil mak tawp khawk a ni a. Police lamin chhui zui miah lova, a bo tawh hnua Godown-a la awm zat bag 1075 chu an man zat anga mipui hriat tura an rawn tar chhuak leh tawp mai hi a mak ka tih a zualin a ṭhen pawh kan hre thei lo he luikam aṭang hian tih ang velin a awmzia leh a ngaihna tak pawh ka hre tawh lo a ni.
Police kuta awm tawh bag 2377 zinga bag 1302 lai ru chhuaktu hi a huaisarin a ngampa hle mai a. Ngampat chhan pawh a nei ngei ang a, chu chu kan Police lamte pawhin an hriat ngei ka beisei. Police Lal nge Sorkar lama hotu lawkten an ru chhuak, nge godown neituten an ru chhuak zawk tih hi mipui hriatah rawn puang chiang turin Mizoram Police te ka ngen nghal bawk e.
- Ma Liana Sihphir Venghlun