ZANAH AIZAWL KHAWLAI A THIM
December ni 6, Thawhlehni zan thim hlimah Sikulpuikawn aṭangin Chanmari Biak In thleng ke in ka kal a, ka thil hmuh leh vei thar tak chu kan Aizawl khawpui kawngpui dung Street Light eng ṭha tawk lo hi a ni.
Sikulpuikawn leh Chanmari inkar hi Aizawl khawpui lun lai a ni a. Sawrkar pisa, sumdawnna hmun pawimawh awmna leh mipui veivak tamna ber a ni a. Street Light-te chu awm ve bawk mahse a inkar hlat bakah a eng viau lem lo a, enkawlna a dawng ṭha lo tih a hriat ngawih ngawih.
Mihring kalna kawng/ footpath ti engtu ber chu motor headlight, mimal Ina pawn electric chhit en leh sumdawnna dawr hming intarna signboard eng thei chi te hi an ni. Hengho hi awm lo phei se chuan kan tlang dung kawng hi a thim lehzual viau ang.
Mizote pawh zan lama kan nunphung a danglam ve ta hle mai. A bikin Aizawl khawpuiah phei chuan zan lamah chhungkua leh ṭhianho a chaw ei chhuahte leh intihhlimna lamte pawh kan uar ve ta viau mai.
Zan lama pawn chhuak ṭhin kan tam ve tak avang te pawh hian kan kawngpui dung eng ṭha lo lutuk hi mipui tan a him lo ta viau mai.
Hmun thim leh kilkhawr deuh lai apiang hi drug addict leh thil sual dang ti ṭhinten remchangah an lo hmang duh zel bawk nen. Hnathawk hawng tlai leh leng khawthawng ke a kal ṭhin, a bikin hmeichhiate tan a him lo zual hle a ni.
Tu mawhphurhna nge ni ta ang le? Kan Aizawl khawpui, India rama State pakhat khawpui ve riang ruang hian ngaihsaktu a va mamawh ṭhin tak em!
Kawngpui dung (main road), a bikin kan sawi mek Sikulpuikawn to Chanmari inkara Street Light dah belh hi thil harsa leh hautak viau a nih a rinawm loh.
UD&PA, P&E Department, AMC leh Local Council-te hian hma han la hram hram teh u. Kan hunpui krismas-te pawh kan hnaih leh tawh hi…
Solar Street Light-te hi han vuah thluah mai ila, zan lama kan khawpui hmelhmang pawh a danglam phah ngei ang.
- Lalnunmawia