Garage nei lo hi chhan tur an ni lo

Mizoram sorkar chuan huaisen takin Aizawl khawpuia lirthei dahna nei lote chu December 1 aṭangin an han vai ṭan ta a, a lawmawm ka va han ti tak em.

Hetihlai hian mi ṭhenkhatin sorkar an lo dem a, sorkar chu tih loh tur ti ang hialin an lo chhuah a, politics-a ṭan lam nei tih tawk vel a ni.

Mizoram sor­kar hian lirthei kawngpuia riah ringawt hi chu man vek se a ṭha ang, kawngpui hi lirthei riahna tura siam a ni lo miau a.

Mizoram sorkar thil tih ni awm lo ang takin hun rei tak chhung ruahmnna an lo nei tawh a, an inhmeh lo zawk a ni. Mipuite pawh a khat tawkin an hrilh reng a, garage nei turin an hriattir a, a khat tawkin mipui hriat turin an puang reng a, mipui pawh insingsakna hun an siam sak a ni.

Sorkar chu a hun tiamah a che ta a, kawng kama lirthei riah an vai a, an man ta a, ka va han lawm tak em. Miin lirthei a lei ringawt a, a dahna a ngaihtuah leh si loh chuan ama thiam loh liau liau a ni mai. Lirthei hi vantlang hmuna riah turin a lei thiang lo hrim hrim a ni.

Pa inti fing fu fu leh thu thiam pui puiin, “Zanah traffic a jam lo, chhunah a jam zawk,” an han ti vel a, chhunah chuan lirthei a veivah tam avangin an park a ṭul a, park na hmun kha an veng pawh a ni lova, an len chhuahna hmun leh thil ṭul tia an kalna hmun a nih vangin man theih a ni ringawt lo. Chhunah chuan mi tinin lirthei kan khawih che tlangpui a, chu chu zanah a dahna inah kan dah mai tur a ni a, a dahna nei lo chu man mai tur a ni.

Traffic jam leh jam loh lam a ni lova, vantlang kawng­pui hi lirthei dah­na in ang maia zan tin maia kum tluana dahna atan hman a thiang lo.

Tin, Aizawla veng tam tak hian an veng chhungah lirthei kawngpuia riah phal loh hi an lo kalpui daih tawh a, chu chu hlawhtling takin an kalpui thei reng a ni. Mi veng pawhin an tih theih chuan a tih ve theih dan zawn mai a ngai a ni mai.

Tunah hian Ai­zawlah hian veng hmun rem lo bik leh garage han siam mai rem lo awih panga awm hi an awm nual a, hengte pawh hi an tum tak tak chuan lirthei hunna zawn hmuh chu thil theih a ni tih veng dangin a takin an lantir tawh tlat a ni.

Sorkar hi a ṭang tlang tur a ni a, kawng­pui kama hnut­chhiah ziah tura lirthei lei ringawt hi chu vai hma hmiah hmiah mai tur a ni tawp mai. Kawngpui hi lirthei tlanna tur a ni a, zan khua khuaa din a, a in ang maia hman hi a ṭul lo. Sorkar hi ṭang tlat rawh se.

- Vanlalvawna