KRISMAS LEH LUNGLEN
Lunglenna hi mi pangngai chuan kan nei vek awm e. Kan lunglen hun leh kan lunglen chhan a inang lo a nih pawhin vawikhat na reng reng chu lunglen tuar vek kan ni tawh ngei ang.
Kristiante'n kan hun pui neih zinga hlu ber Krismas pawh hian lunglenna thlarau a keng tel tlat. He hunah hian hla phuah thiam te, thuziak thiam te chuan thu leh hla mawi tak tak an phuah chhuak a, Krismas hian thu leh hla - literature a tih hausak phah em em ṭhin.
Krismas lo awm chhan leh hlutzia kan hre vek a. Chhungkaw kima hman tumin kar hla taka awm te pawh kan in lamah kan haw khawm ṭhin. Nula leh tlangvalte pawhin an kawppui te nen he hun hi hlim tak leh hriat reng tlaka hman an duh ṭhin a. Amaherawhchu, kan hmalam hun tichhe zawnga kan hmang a nih erawh chuan a tuartu tur chu keimahni kan nih avangin fimkhur tak leh kan hriatreng zui tlaka hman hi kan mawhphurhna a ni.
Chhungkaw kima hmang thei lo te pawhin he hunah hian an hmangaih kal ta te an ngaiin an lungleng thar em em thin a. He hun lawmawm tak hi chhungkaw kima an hman ho lai te an ngaihtuah a, an lungleng thar leh em em thin a nih hi.Chung an lunglenna te chu thu leh hla hmangin an puangchhuak a, hla nalh tak tak te, thuziak tha tak tak te a lo piang chhuak thin.
Kohhran pawhin he hun hlutzia hi a hria a, ruai nen he hun hi kan lawm mup mup
ṭhin. Pathian fakin hlim takin kan zaikhawm a, naupangte pawhin he hun hlutzia hi la hrethiam kim phak lo mah se thawmhnaw neih nalh ber ber kan ha a. Thingtlang lamah phei chuan Masi ruai ṭhehna tur changel hnah kan pu a, a va hlimawm thei tak em!
Kan pi leh pute pawhin he hun lawmawm a lo thlen apiang hian an vanglai an dawn kir a. An vanglaia an ṭhiante, an hmangaih kal ta te an ngaihtuah kir a, an lung a leng vawng vawng ṭhin.
Krismas hi a la awm zel dawn a, chuvangin Krismas kan hman apiang hi nakin zela kan lung tilengtu, kan hriat reng tlaka hmang turin in buatsaih ila. Tichuan nakina kan inchhir zui vawng vawng na tur thil kan chungah a lo thleng lo ang - Krismas thawnthu lunglenthlak leh ngaihnawm tak kan neih theih nan.
He hun neitu Lal Isua duh zawng hre rengin mi dangte thilpek pe in em ni kan hman ang? Nge he hun neitu Pathian fakin kan zaikhawm tluk tluk dawn? Ṭhiante nen ar te kan kang ho mai dawn em ni?
Ruihhlo leh a kaihhnawih sual ti miah loin he hun hi i hmang dun ang aw? Am takin chen ila, a neitu Lal Isua nen he hun tawite hi i hmang ang u.
- Rinfela Zadeng