LÊNGPUI
Kum tam fê liam ta, Lêngpui airport hawn hmâ, hna a kal mup mup lai khan a hungna hna thawktu (contractor) pakhat nen kan titi a. A zauh dan vêl a’n sawi khan kei ta pek chuan ‘A va’n ho tak êm! Chutiang leka zau/ zîm chu maw? Engah nge maw thuneitute hian anmahni dam chhung hun tur tal pawh an ngaihtuah phâk ngang loh le aw...! Chu’ngte chu a zîm lutuk a nih chu.
Thlawhna ṭumhmun lianah chuan a sîr vêl thingkûng hnuaiahte hian sipai thlawhna ni awm tak tak, râng riai ruaite hi an bawk ṭhiap ṭhuap a ni ngai a! Chung chu metal road hmangin, a thlawh chhuahna leh a ṭumna kawng (runway)-ah an tawlh chhuak zung zung mai asin ni! Keini ve zawng thlawhna han dah ṭhat lailâwkna (hangar) han siamna tur pawh a awm lo a nih chu. Nakina kan siam leh duh hunah chuan compensate tam lutuk a ngai tawh awm si a’ tiin a duh khawp loh thu ka phunpui ta chiam a nih kha!
Tichuan, a enga pawh chu ni se, khang huna kan ram hruaitute dam chhung ngei mai chuan kan duh khawp ta lova, ‘tih-len, Air Force kuta hlan’ tih te kan sawi ri ta a nih hi! Air Force kutah han lût dawn ta tak tak se, a tîra ngai aia eng anga tam compensate hi ngaih belh ta ang maw? Mahse kei hi pa danglam pui ka ni roh emaw ni - ka ngaihdan kha ka thlâk leh ta daih roh mai nia!
Indo hunah rêng rêng hian hmun pawimawh - khawpui lian te, thil siamna hmun (factory) lian te, thil laih chhuahna hmun te, inkal pawhna (kawngpui leh lei) pawimawh te, râlthuam siamna leh dah khâwmna hmun te, thlawhna ṭum hmun te, ei leh bâra kan in hnangfâkna hmunpuite hi hmêlma ngaihmawh hmasak turte niin ka’n ngai ve ngawt a. Tuna kan ram dinhmun thlir chuan khing ang hmun pawimawh pakhat mah khi kan nei zo ve lo.
Chuti a nih chuan Bangladesh emaw, China emaw nen hian India tualthu hi chhia-in, han indo ta pawh ni se Mizoramah hi chuan hmêlma ngaimawh tur hmunhmâ kan la neih loh vangin, an beihpui rawn thlâkna tur lakah chuan rei fê chu kan him lel ang a; kan nunna pawhin a him nasat phah ngeiin ka ring!
Ram buaia India jet fighter rawn thawk pawh kha Jorhat (?) aṭanga rawn thawk niin ka hria. Gawahati-ah pawh khuan, ngaw hnuai emaw tihah khuan sipai thlawhna ni awm tak tak hi a inhûng fer fur nia! Chung lo pawh kan hnâivai tak takah hian, kan neih ve aia thlawhna ṭumhmun lian tak tak dang pawh awm âwm tak a ni. Tin, kan rama hmun pawimawha kan neih ve ai daiha hmun pawimawh hi kan chheh vêlah hian a la tam daih bawk nen. Chung hmunte chu hmêlma-in, indo thlawhna (fighter) leh râlsâi bomb (missile)-a tihchhiat tuma an beih hmasak tur an ni ngei ang.
Tichuan kei hi chuan tuna kan neih aia thlawhna ṭumhmun lian hi chu ṭûlin ka la hre hrih miah lo a nih chu! Mahse kan Mizo Kristian zingah hian, sum siamna remchâng tura ngai mihring leh, chuta chanvo nei pha tura inngai mihringho rilru hi eng ang rua ni ve ang maw! An awm a nih chuan ‘Kan dan theih a ni lo, kan ram hmasawnna tur a ni’ ti velin an sawi thiam leh dur dur teh ang chu!
Mi state-ah chuan sawrkar remruat, duan, ruahman leh dâl thei thil (legally) awm miah lohna thilah pawh mipuiin an duh tlat loh vanga dodâlna, hnialna (protest) leh buaina chhuah vangin tualchhung miin nunna pawh chân an hreh loh thu leh an chân hial thu-te pawh TV-ahte kan thlîr fo a nih hi.
Rorêltute chu dik tak leh thlei bîk nei lova rorêl tur an ni. Kan ṭhatna tura Pathian rawngbâwltu an ni (Rom 13:4). Kan ṭhatna tur hawi lova ro an rêl tlat hian Pathian ruatah kan la ngai lui thei hrâm zêl dawn em ni? Heng chungchâng thil lovah pawh - ram leh hnam hmangaihna kawngah pawh hian!
- C.Biakzuala