Police nupuite motor tih kal zel....

MS-a Ralte khan Mizorama Police Officer ṭhenkhatin motor pakhat aia tam an kawl thu, an nupuite pual anga kawl an awm tihte a rawn ziak tawh a. Chumi chhun­zawmna chu Novem­ber ni 8, 2022 khan Lalthanmawia, Bawngkawn khan a rawn nei tawh a, a thling baw hawk khawpin han chhun­zawm ve leh hi a ṭul a hriatna ka nei tlat. An hming sawi lovin a veng hmingte hi chu sawi a pawi lo turah ka ngai a ni.

Hmanah khan Luangmual lamah Police Officer pakhatin a in sâ tura Police a chhawr thu leh thlalak kha a rawn lang tawh a. Kha mite thlà latu khan tun hma deuha Chanmari Veng leh Tlangnuam lama Police rualin in an sak kha chu hmù se chu thlà an la ve ngei ngei ang.

Zarkawtah pawh Police Mistiri thiam deuh in sak a awm an tih bakah Luangmual lamah khuan hmuhnawm larh khawpa in sak pakhatah chuan Police an tam theih thu hman deuh khan an sawi tawh a, Electric Veng ah pawh an awm ṭhin an ti.

Lockdown vanglai pawh khan Durtlang lamah duty tur ni si lovin Police hi an inzui chho diah diah ṭhin a, hnathawh kawr an ha hlawm an ti tlat a ni.

Police hi an langsar hma ta luah ṭhin a, lang ve si lo hian PWD, PHE etc lamah hian pute in sâ ve tho, pu te pipe fit ve tho hi an tam a nia. Mi ṭhenkhat chu anmahni an lang lova Mistiri leh labour hlawh kha Department lamin an pek sak angin an lo adjust leh hmiah hmiah a, heng te hi kan ram ṭhan mawh bawk chu an ni.

Officer leh Engi­neer huanah MR engzât nge riak le? Thlarau MR engzât nge awm le? Kan sawi tâk Police Officer thlamah Police Constable chhawr an awm em? Ramri buai lai khan an indaih loh thu hriat khan Ardali (Orderly?) lamah an kiam chuang miah lo an tih chu!

Heng thil kan sawia lo haw tlat Officer leh Engineer an awm chuan anni lam an dik tawk lo tihna a ni phawt. Police mi ni si Mistiri hnathawk thei tuna an pute private in sâ mêk zat hi RTI Act hmanga dil theih a ni em le?

Arderli hi an chhawr theih zat a awm a, chu chu sawisel tur ni loin an phu ve reng leh an Officer nihna ken tel a ni thung. A bak an chhawr hi chu sorkar pawisa anga in sâ an nih avangin corruption tho a ni.

Police Officer leh Officer dang motor kawl in sawi in sawi lai hian heti lam hi lo chhut ve ta che u. Sorkar hnathawk hlawhah public money an hman chuan kan pawisa a ni si.

- Masiama, Chawnpui