Khehpuam chim chin hi a A ril lutuk an ti!

"Kan dawhkanah chuan nuai 200 a rawn dah ta hnur mai a! A tama an tamzia mai chu! Chutiang zat pawisa chu kan nupa hian kan la hmu lo reng reng. Mahse, pawisa rawn dahtu kan en a, thinlungah ngaihngam lohna lian tak a awm si. Heng pawisa zozai hmanga thil kan tih theih tur ngaihtuahin pawisa chu it loh a har hle. Mahse, Pathianin kan ei tawk chu kan nupa damdawi dawr nghah aṭang hian dik tak leh fel takin min pêk ngei kan rin avangin pawisa chu kan la ta lova. Tun thleng hian inchhirna kan la nei lo" tiin a sawi a.

Khehpuam damdawi chah nâna an dawr license kaltlanga thlemna lo do daitu, Aizawla damdawi zuar pakhat testimony hi a ropui ngawt mai. Heti zat pawisa hnar phal lo erawh an awm ta tho mai.

Pa pakhat ve thung, dam­dawi latua an hman ṭhin chuan, "A mak khawp mai. Midang kan thurualpuite tel lova mahnia damdawi phurh luh ka han tum ve ta a. Mak deuh deuh hian nidanga tluang taka kan tlangna ṭhinah chuan min lo rek leh nawlh nawlh zel a. A ruk thei ang berin kal pawh ni ila, mi hi an man ngei ngei mai a ni. Mahse, midangin min han chhawr ve thung chuan mak tak mai hian min manna awm turah pawh hian tluang takin kan tlang leh mai zel" tiin a inpuang thung a.

He khehpuamah hian a hre ril zual inti leh officer lian hnuaia thawk thil chikmite chuan khehpuam lakluh thuah hian Mizorama mi thiltithei lianpui puite hi an inrawlh nasain Minister-te zingah pawh hian inrawlh an awm ngei an rin thu, an thil hmuh leh hriat ṭhenkhat aṭangin an sawi ngam tlat a ni.

Tunah pawh hian damdawi zuartu zinga mi hi rinhlelh lianpui, damdawi dik zuartute vek hian an nei niawm tak a ni. Chuvang chuan hmanni lawka IAS bail-a chhuak ta kha hrem hmasak ngei ngei, khehpuamin kan rama bu a khuar dan chhuichhuah nân a pawimawh hle reng a ni.

Ṭhalai rual thisena eizawng ngamtute hi hnam hmelma lian berte zinga mi an ni tih kan inhrilh nawn mawlh mawlh fo hi a va ṭul tak em! Hremhmunah zawng an pualin hmun bik an siam turah pawh lo ngai ta ila. An dam lai la la hian an thiltih rah an seng hi dikna leh felna an lo dinchan theih nân a pawimawh hle a ni.

A tawp berah chuan he­tiang zat zat damdawi hi license pakhat hmanga lak­luh a nih chuan, Mizoram chhûng a rawn luh phat aṭanga a kalkawng zawhah hian hmuh chhuah loh leh rinhlelh­awm lova a zinkawng hi zawh ngaihna awmin a lang tlat lova. Nimahsela, an chawk luh reng si danah hian kan rin aiin mi thiltitheite an lo inrawlh nasa a ni ngei ang tih hi a rinawm em em a ni.

- Liana Pachuau