Kut hnathawkte min nghawng dawn

Central sorkar chuan a hnathawkte tan 7th pay a pe ta a, state lian leh hausa dang pawhin hemi zulzui hian a pe mek bawk. Mizoramah pawh cabinet chuan he lam ngaihtuahtu tur committee a din fel thawkhat tawh a. Committee hian beng sikin a ngaihtuah dawn a, chutihlai chuan kan sorkar hna­thawkte chu nawrh an huaihawt rup mai a nih kha.

Mizoram sorkar hnathawkte hian central pay zawmin hlawh han la chiah se keini kuthnathawk leh mimal hnuaia thawktute min nghawng dan tur hi a rap­thlak dawn hlein a lang. Engkim a to dawn a, phai aṭanga ei leh bar lakluh chu thuhran, keimahni tharchhuah ngei pawh a to fang tawh mai dawn a ni a, a huphurh awm hle.

Mahse sorkar hnathawkte hian an kuang lo an nawr a ni bik lo. Thil man to zelah leh pawisa hlutna tlahniam zel laia state dang pawhin an hman mek laia hetia 7th pay an nawr hi thil awm lo pawh a ni bik lo ang. Mizoram phei chu mi tam zawkin sorkar hnathawk hlawh

aṭanga sum hmu ve mai kan ni a, chu­vangin sorkar hna­thawk hlawh a san chuan sum lengvak a tam phah dawn a, an zar zona tam tak a awm thei ve ang chu.

Amaherawhchu, sawi leh sawi hnu, sorkar hnathawk hlawh a san al mai chuan engkim man hi a sang ve nghal dawn tih chu thil chiang sa a ni a, nitin inhlawhfa tan chuan huphurhawmna chin a awm ngei ang. Private hnuaia thawkte pawh nasa takin min nghawng dawn a, hnathawkte'n 7th pay an hman a, kan pute'n kan hlawh an san ve chuan si loh chuan kan kun tlawk tlawk mai dawn chu a ni phawt mai. 7th pay kan hman loh pawha kan harsat tawh tehluh nen.

A enga pawh chu nise kan sorkar hnathawkte pawh hi an hmanhmawh mah mah ka ti ve ṭhin. Cabinet-in central pay kan hmantir ve thei dawn em tih zirchiang a, ti hlawhtling thei tur leh ennawn turin committee a din a, hma a lak mek laia heti chawng chawnga ni hnih ngawt han nawrh chu mipui mimir, sorkar hna­thawk ve lo chuan kan hrethiam lo a, kan dem hle a ni.

Eng sorkar hna­thawk bik nge maw an nih tih mai khawpin an thikawm tawh laia anmahni ham-ṭhatna ringawt um a, kan hunpui lo thleng dawn mek karah ni thum chawlh an han tum ringawt a, an in hnuk hniam a, ni hnih an chawl hram khan nghawng a nei thui khawp mai. An ni hnih chawlh lak kha ai kha an hlawhah kan sorkar hian cut ve ngei rawh se.

Kan state budget zaa 35-45 zet an hlawh ringawta a kal hi kan hre ve kar a, hlawh ṭha tawk neiin thlan tlaa thawh tur pawh awm si lo, a tam zawk fe chu an la awl em em zui.

Chhiatni ṭhatni-ah lah office an chhuah­san awlsam hle lehnghal. Khawngaihin han in enlet ve leh se, ni hnih an chawlh hlawh kha sorkarin a cut luih sak lo a nih pawhin sorkarah an chhunglut ngei turah pawh kan ngai e.

- Lalkhirhvela