Lal pianni champha kan thleng leh ta

[Edom rimtui leh rangkachak ai chuan, thinlunga ṭawngṭai a hlu zawk...!]- Rokunga (Fam)

Ber thla kan lo chuang kai leh ta reng mai, hunpui boruakin min rawn nangching ti tih leh ta. Ral khat lam hla tak aṭangin inthlahrung ni awm fahran takin, khawchhak lam aṭangin ni êng mawi a rawn chhuak de va va a. Hmuhlawk si loh thlazing paw'n kian zai rel ṭanin, khawchhak lamah Tlaizawng a pâr vul chuk ṭan leh ta bawk a. Lunglai kan mawi zo ve dawn nem maw; khawthlang lamah nise - Builukham, Japanhlo, Midumpâr leh Pholeng te'n pâr an rawn chhuang

ṭan ta. Nghilhni awm si lo nunhlui ṭahna mai min thlen leh si ṭhin. He ka nghakfak krismas hian chuan engkim mai hi a her danglamin a thunun emaw tih mai turin kan khawvel hun leh ni hi a sawi danglam chiang a ni.

Kan nghahfak masi lawmna vuakvet thawmri a kat nuk chinah tawh hi chuan, veng kil khawr leh veng chhung hmun lunlaiahte chuan a ṭhenin urhsun fahranin a pianna lam hla an rawn hmet chhuak

ṭan leh tawh a; chuta kan rilru milpui leh kan lunglên mittui tla hul thei tawh map lo tura kan han ṭah hmasak phawt

ṭhin a han ngai te te leh ṭhin hi chu - he kan inlehthal chhawkna, nuam tawla kan inkhualtelem siakna khawvel hi chu a va ho chiang em!

Fak hla mawi phuahtu, Jonathan Hmingthantluanga'na 'Krismas leh Kumhlui zùn’ tia a lo chhawpchhuah, zaithiam chuai ni nei lo, Tetei Ralte-ina mawi leh lungkuai zeta a sak hi ka ngaithla a, hnuk ulh chungin van lal pianni champha hi kan lo hmang ho hi a ni tlata hriatna ka nei thar hnuhnawh a. Hmanni ka khualzinna sumo-ah, vawi li lai ka play nawn tir a; mathei lovin ka ngaihtuahna a kal thui hle mai a, lal pianni champhaphak a ni miau va tiin... heti hian a hla thuah kan hmu a:

"Kumpui sul pawh a her liam leh dawn ta,

Sikni engmawi ngai ten a her chhuak e;

Vanlal pianni champha damten kan thleng leh ta,

Zaleng zawng ten hranglu iang an lawm e;

Fam ngai te tan suihlung ti lengtu mai"

Ni kuma masi thing kan phurhpui te, chhangban kan fak pui te, lamtuala hmun laili changa min lam kual puitute ngei kha tûnah rihsãng mual an lo liam zo va, an sulhnu ram tawh mai chauh chu min lo hnutchhiah hi a lo ni reng ta mai, tih ka hriat chuan ka mit sulha biangah mittui a dîr lo thei lo! Famkim tikni awm ngai lohna tur khawvel ṭahna ram tak hi chu aw...

"Hmatiangah kan thlir hun leh kum lo thar tur,

Suihlung erawh a leng a hnîm ruai e;

Kei zawng ka ngai hmanah lenrual lungduh zawng nen,

Krismas lawmin hlimten zai kan vawr kha;

Tunah erawh suihlung tilengtu mai."

Hlim tumin chhungkaw tin inbuatsaihin fak chak hle ṭhinin, inbuatsaihna ṭha eltiang pawh nei mah ila, hmuhlawk loh heng; thihna, vanduaina, natna leh lungngaihnate a lo thlen hian he mihring nun hi chu a va tlo lo em! Damchhuakin khawvel kan hmang a, lungngaihnain kan khar leh a, ṭahnain kan in mangṭha leh mai lekfang hi a lo ni.

Natna, lungngaihna, mangan leh khawharnate a bik bo tawhna hmun tur vân in nuama krismas tak tak hman hun hi a nghahhlelhawm tawh ngawt hian ringtute tan hian ka hre ṭhin. Chu in nuamah chuan hnemtu kan mamawh tawh lo vang a, krismas aia krista ruai a takin kan kil/ chang dûn tawh anga ava nuam dawn em...

Leiah hian chuan, hringmi mawina pâr a chul a la ngai a, kum erawh a thar zel a la ngai si a, hun leh tui luang tena awmzia an neih hun tur hi a nghahhlelh awm ṭhin.

"Hnemtu ngaiin ka vai ruai e,

Ngaihloh ang hian an liam zel si;

Hringmi mawina par ang chulin,

Kumsul erawh a thar zel si;

Siamtu remruat dan lo ni e,

Lal pianni champha kan thleng leh ta"

Zing ṭian lenkawl leh ram lo lentu, thing siri te zartin an mawina leiah hian, hlutna nei krismas hi mi tinte thinlungah hlu turin tlo se, tlo turin hlu tel teh reng se, a va ṭha dawn em.

Kan hunpui lian, kan nghahfak tlumtêa thlir taka kum bul aṭanga kan lo thlir

ṭhin hi, a thuchah ken lai mu tak zawk a chu: Krismas hi Krista ruai a nih angin, he krismas thawnthu pawh hi Remna, a thuchah erawh hmangaihna, krismas thilmak ropui em em chu Lal Isua hi a lo ni, tih hi kan hriatreng atan a duhawm hle ang.

Tihian, he hla thu hmang hian a tawp kan khar mai a ni ang chu:

"Awle, kumhlui damten mual liam ta la,

Nunhlui ngai a suihlung len hruai ve la;

Hun leh kum lo thar tur hringmi tan malsawmin,

Min hlan ta che duhsak chibai buk nan;

I zun ngaih zawng suihlung a leng e mai"

- LH Hauheng, Nghilhloh Rûn