Lungawina nei lo sawrkar hnathawk

India sawrkar leh Mizoram sawrkar hian an hnathawk (sawrkar hnathawk) te hi an duat lutuk a, awm chin tawk hre lovin, fapa duat sual ang mai hian an thla bi hlawh lakah lungawi ni an nei lo a. Hei hi a manganthlak takzet a, an hamṭhatna dawn zawng zawng te hi, a tam zozai lutuk, hei hi sawrkar hnathawk ve lo tan chuan hahipa sawi tham a tling.

A bikin Mizorama sawrkar hnathawh kan chak em em chhan chu hahdam taka tam tak hlawh kan duh vang leh thawh loh nia hlawh lak reng kan duh vang niin a lang. Tin, an damloha senso sawrkar in a tumsak vek bawk a, a ṭhen chuan dawt bill an la la hreh lo zui. Heti em ema sawrkar hna kan inchuh chhan pawh an hlawh a tam vang a ni.

Kan state sawr­karin a sum dinhmun en chungin tunah 7th Pay a la pe thei lo a nih pawhin lungawi takin pawm ngam rawh se. Political party dang pawn he thilah kher hi chuan sawrkar hi thlawp teh se. Tin, sorkar hnathawkte hian an hnathawh leh an hlawh lak te hi a in phu tawk em? tih te hi chhut se.

Tlai tawka office kal a, hma taka haw a, tam tak hlawh tum Kristian sawrkar hnathawkte hian an thil nawr hi a awm reng em tih hi in ngaihtuah nawn mawlh rawh se.

Population ngaih­tuah a, sawrkar hna­thawk tam berna ramah hian sawrkar hnathawk enkawlna atan hian kum khata sum kal ral a tam avangin ram hma­sawnna tur awm lo khawpin sum kal ral a tam a ni. Tuna sawrkar hnathawk te hlawh leh hamṭhatna hi a ṭha tawk tih a chianna chu an in leh lo ṭhat danah leh an khawsaknaah hian a lang chiang tawk a, sorkar hnathawkte hlawh hi tinsan tawh hrih lo hram ni se.

Hemi chung­changah chuan sawr­kar hi huaisen deuhin ṭang ngam teh se. Sawrkar hnathawkte aiin a thawk lo hi kan tam zawk a, tlak hlau miah lovin ṭang kawh tlat rawh se. Kan state mamawh tawk aia tam sawrkar hnathawk awmna ram, office kal card deng mai mai, hna­thawh tum lo, zirtirtu indaih lutuk zirlai naupang nei mang si lo, a ṭhen te phei chu mualpho hlauh vangin sumdawnna dang an han ti khaw­mawi ve bawk a.

Sawrkar hi nghet takin ding se, nawrh an sim phah nan an hlawh pawh cut zel se, an hlawh tamzia te hi an in hriat chhuah phah ngei ang.

- Khuma, Ramhlun North