HALPUAH

A khuh hawnna

Thla a lo sik a, khua a vawt a, mi hrisêl pângngai pawh kan hritlâng sup sup a, a la na zual deuh phei chu krismas leh kumthar hman nuam lo rawih khawpin an pik leh ngei ang. Khaw vâwt leh hritlâng hi a inzawm tlat em âw tih hi ngaihtuah tham a awm. Khawthlang lam unaute phei chu vûr sûr chum chum khawpin an chênna a vawt a ni a, an nipui lai ve pawh kan thlasik ang vêla lum ṭâwkte pawh a ni chauh a, an hritlâng ve sup sup lêm lo. Khaw vâwt nena inkaihhnawih ni ngawt se Mizote aia hritlâng nasa tur an ni.

Boruak a bawlhhlawh avânga hritlâng kan ni a, khaw vawh laiin boruak bawlhhlawh a zual avângin hritlân a awl a ni zâwk. Hritlâng kan tam dân aṭang hian kan boruak hipte hi a thianghlim tâwk lo tih a hriat theih. Chutih laia boruak tibawlhhlawh lehzual tura hâlpuah kan han hâl vak mai ṭhin hi chu âw? a dâwn tâwi thlâk deuh e.

Hâlpuah chu eng nge?

Hâlpuah kan tih hi China siam a ni a, BC 206 - AD 220 inkâr vêla an tihchhuah nia hriat a ni. A puak hrim hrim hi an lawm avânga siam an ni lo a, thlarau sual hnawh bo nâna an siam a ni. Bian pao an ti. Atir takah chuan mau hring meia an rawh hian a puak pawp ṭhin a, chu chu ran leh ramsâte khân an hlauh theih êm avângin thlarau sual pawhin a hlau ngei dâwnin an ring a, hun pui bikah chuan thlarau sual hnawh bo nân mau hring an rawh ta fo ṭhin a ni. Chuta ṭang chuan hâlphuah hi an lo siam chhuak ta a ni.

A hnû deuhah chuan thlarau sual hnawh bona atân mai ni loin hlimna leh hmuingilna atâna ṭawngṭaina angah an hmang zui ta nghê nghê. Hun pawimawh bik chhinchhiahna atân an hmang chhunzawm ta zêl a, naupiang te, thihna te, inneih te, inchâwimâwina ni leh kumthar lawm nânte an hmang ta zêl a ni. Khawthlang lamah a darh zêl a, tûnah chuan khawvêl pumin an uar ta hle. A hmuchhuaktu an ni bawk a, China hi tûn thleng hian hâlpuah siam chhuak nasa ber an la ni reng.

Engnge a sualna?

Sualna a nei lo; ṭhat lohna a nei. Hâlpuah leh hâlmâwi lam chi rêng rêngah hian tûr hlauhawm tak tak a tam hle. A mâwina maiah hian tâwp se pawi lêk lo tur hi a ni a, mahse a mâwina hian meikhu hlauhawm tak a keng tel a ni. Natna chi hrang hrang- lung lam ṭhat lohna, thawhah, thâwkna lam fel lo, hrawk dâwt zâ (bronchitis), thâwkna dâwt kaw tâwt, laryngitis, emphysema, pneumonia leh thil dang dang a thlen nasa hlê ṭhin tih finfiah a ni.

Hâlpuah hi a siam phung a dang thluah a, tûr hlauhawm an pai pawh a inang lo fur mai. Sulphur, manganese, cadmium, lead, zinc, sodium, magnesium, potassium leh beryllium-te hi a lâr zual a ni. Hêngte hi mihring taksâah tlêm tê bâk awm phal a ni lo a, taksa zawh tâwk bâk a awm vaih chuan tûr hlauhawm tak a ni. Atirah chuan sêrthlum rawng leh a vâr bâk an siam thiam lo a, tûnah chuan rawng chi hrang hrang an siam thiam ta. Rawng chi hrang siam tura tûr an hmante chu strontium (sen), barium (hring), copper (pâwl) leh sodium (eng) te a ni a, chlorine dip an telh bawk ṭhin. A puah awlsam nân Potassium Chlorate an hmang bawk. Hêngte hi mihring hip atân chuan tûr an ni vek.

India rama hâlpuahahte hian Toxic Link an tih pawlte chuan tûr hlauhawm tak oxide chi hrang hrang, lead, cadmium, sulphur, phosphorous, nitrogen leh carbon-te a tam hlê a ni tih an sawi a. Hêng tûrte hi tui hnâwng nena a inchiah chuan acid hlauhawm a siam chhuak thei vek a ni. Kan hip luha hrawk hnâwnga a inchiah chuan acid chu a lo insiam ta a, chu chu taksa bung hrang hrang, a bikin hnâr, hrawk leh chuap tân a pawi thei hlê a ni. Hetiangin,

Hâlpuah hâl rûnpui lai hun hian hetiang natna chi hrang hrang hi zâa 35 zetin a pung ṭhin a ni tiin Toxic Link chuan an finfiah. A ri bengchheng hrim hrim hian beng a tichhêt thei a, BP sâng a thlen a, lungphu châwl leh mut theih lohna a thlen bawk ṭhin.

Hnam fing zâwkte pawhin an hâl tho si a?

Chuti khawpa hlauhawm chu engati nge hnam fing zâwkte hian an hâl tho si? Hnam fing zâwk kan tihte hian an fin zâwk ang bawk hian hrisêlna atân a ṭha lo a ni tih hi keini aiin an pawm hmasa zâwk asin! Chuvâng chuan dân fel tak neiin an hâl ṭhin. Hâlpuah nazawng hâl an phal lo a, sawrkârin siam chhuah a phal chin chauh an siam chhuak a, hrisêlna tichhe lo thei ang ber tura siam chauh an hâl ṭhin.

An hal pawhin hal thei tura ruat, pyrotechnician-te nen chauh hal an phal a, chu pawh danin hal awih a tih chin chauh a ni. A hman hman, a phur phurin an hal ngawt lo a, zankhaw tairek thleng thlengin an hal hek lo. Hunbi fel tak neiin minit reilote chhung lekin an zo mai ṭhin.

India ramah chuan Supreme Court-in hâl theih chin a bithliah a, hâlna hmun aṭanga metre 4-a hlâa teha dB 125 aia ring chu hâl phal a ni lo; chu chu motor ke puak pawp rin zâwng ang vêl hi a ni ang. Tin, zân reia hâl a phal lo a, zân dâr 11 leh zing dâr 6 inkâr chu mutna hun, bengchheng siam awih loh hun a ni. Kumthar zânah thlah dul a awm chuang lo. Mizoramah chuan zanlai chu kan hâl duh hun lai ber a ni a, dân kan bawhchhia tihna a ni. Kristian ṭha tak awm khâwmna ramah hian dân bawhchhe chungin vânram kai kan tum ṭheuh chu a ni âwm e!

Tlângkawmna

Hâlpuah hi a puak dur a, rawng mâwi tak a chhuah bâk hi a ṭhatna sawi tur a vâng hlê. A hlimawm hranpâ ve e tih lohah chuan mihring leh environment tân chhiatna hlir a thlen a, mi tam takin natna vei phahin thawhah leh âwm lam ṭhat lohna vei sâ ṭhenkhatte phei chuan an thih phah fo bawk. Thil puak dur satliah lâwma mahni hrisêlna hralh hi phal chi em ni dâwn? Ka pu vawm vawma tui, i in ngam leh in la i dâwt ngam leh dâwt rawh an tih ai maha ṭha lo kha a ni a, vân êk khum tum aiin a pawi zâwk. A hâltuin a tuar mai lo a, midangin an chhiat phah tel ve tlat hi a pawi zualna a ni. Harsatna thlentu lianpui a nih avângin insûm hrâm hrâm ila kan ṭhat tlânna tur zâwk a ni e.

No. Tûr Mihring a khawih pawi dân
1. Cadmium Thisen cancer a thlen thei a, kal a tichhe bawk. BP a tisângin ruh mawihna chi khat ‘Itai-Itai’ a thlen thei.
2. Lead Hâl a nih vaih chuan khu hlauhawm tak a chhuah. Hriatna thazâm bâwmpui (Central Nervous System) a khawih pawi a, chuap leh kal cancer a thlen thei bawk. Rilru ṭhan a tiṭhû thei a, naupangah thluak a khawih pawi zual bawk.
3. Magnesium Thir khu natna (khawsik) a thlen a, hriatna thazâm bâwmpui a tichhe thei bawk. Vuna a inphûm chuan bâwk (gangrene) a siam bawk.
4. Nitrate, Nitrite, Sulphur leh Phosphorous oxide-te an ni a, thil eichhetu an ni.
Phosphate,Sulphate Rilru kim lohna leh coma thlen theitu an ni.
5. Carbon Monoxide Tûr hlauhawm a ni. Thisen nêna a inpawlh vaih chuan taksâa oxygen awm zawng zawng hmun a luah vek thei. Thihna hial a thlen nghal thei.
6. Copper Thâwkna dâwt a tizain a khawih pawi ṭhin
7. Manganese Mut theih lohna, zeng, chauhna, rilru nghet lo leh kaih lam chi leh engkim mai ninna a thlen thei.
8. Potassium Mei alh a insiam thei a, a puak dur thei.
9. Sodium Hnâwng leh lumin a pawlh chuan a puak thei a, mei alh a siam awlsam hle. Vun a kâng thei bawk.
10. Zinc Hip luh atân a hlauhawm lutuk lo. Vun a tithak thei a, luak a tichhuak thei bawk.
11. Nitrogen Oxide A thûr avângin thil ei chhetu a ni. Thâwkna dâwt tuamtu (lining) a ei chhia a, allergy chi hrang hrang bâkah thawhahte a thlen thei.

- C. Lalduhawma