DANBAWHCHHEPA

Kumin hian lirthei leh a kaihnawih lamah sorkar hmalakna hrang hrang a tam hle. Taxi intlanchhawk, lirthei number tawp ber number ang nia tlan loh, two wheeler taxi service tan, December ni khat aṭanga zan lama kawngsira lirthei riah khap leh garrage nei ngei tih chianna certificate-te an ni.

Mahni lirthei number tawp ber nia tlan loh hian kan Aizawl Traffic jam ṭhin a tihziaawm phah lo nia ngai mi tam tak an awm. Tin, zan lama kawngsira lirthei riah hi ngaimawh chhan tur a awm love, chhuna kawng sira rei iak dah (park) ṭhin hi ngaimawh zawk ila zan lam chu mipui kan chhuak tam chuang lova, duh leh kawngsirah chuan dah mai ang hmiang ti pawl an awm bawk. A ni lah tak a, zan lamah chuan traffic a jam khat khawp mai.

Vanglaini December 12, 2017 chhuakah khan 'Aizawl Traffic Police leh Transport department-a enforcement staff-te chuan nimin zing aṭang khan ngaihnathiamna tel loa lirthei enfiahna, No Tolerance Drive an kalpui

ṭan a, Dawrpui pheiah DIG Joseph Lalchhuana'n a hawng. Hetih lai hian, nimina Aizawla police hotute ṭhukhawm chuan, mipui himna tur leh râlmuang taka hunpui an hman theih dan turin lirthei veivâk, a bikin zan lamah enfiah a, rûi chunga lirthei khalhte chu a na thei ang bera hrem an rêl' tih a lo lang kuau mai a. Hetiang hun hi kumtin Kristmas dawn hnaiah neih thin a ni. Thil thar pawh a ni lem lo.

December 12 chawhma dar 10 leh 11:30 inkar khan, Ramhlun - Chanmari - Zarkawt - Treasury - Tennis court - Khatla - New Secretariat - Chawnpui - Vaivakawn - Chanmari West - Chanmari - Zarkawt - Zodin - Temple - Vaivakawn kawngah ka tlan a, khawi laiah mah Traffic jam a awm lo. Aizawl Traffic Police leh Transport department hmalakna 'No Telerance Drive' hi a va ṭha em ka ti hial a ni. No Tolerance drive hman loh hun lai chu nise, ka tlankual hunlai khi traffic jam vanga kan nunphung a buai hun lai a ni kumtluan. A chhan pakhat chu, Zirtawp (8) aṭangin khua a chhe ṭan a, ruah a sur nasa. Khawvawt vangin pawna chhuak kan tam lo hle. Thawhlehni (Dec 12) ah khua a eng ṭan, a ṭha ṭan. Hetiang ni hian Aizawl khawlaiah teichhuak an tam a, traffic jam a tam ziah tih kum tluana teichhuak ṭhin chuan kan hre awm e.

Ruahsur reng hnua khaw ṭhat ni hmasa ber hian traffic jam a tam ziah ṭhin tihna a ni. Amaherawhchu, No Tolerance Drive hman ṭan hnu, December 12 chuan a thawl ṭha hle.

A chunga kan sawiin a entir chu, Dan bawhchhe reng chungin kan inkhawm dual dual a, sorkar diklohna kan sawi pung pung a, eirute leh hleprute kan kawk a, khehpuam avanga miliante kan nuih mek a. Mahse, lirthei nei tam zawk chu Dan bawhchhepa leh Dan bawhchhenu kan ni vek a lo ni.

No Tolerance Drive hi kumtluanin neih ni mai zawk se. Lirthei indinchhawk ai pawhin Aizawl khawpui a thawl phah tlat. Kan traffic police te an indaih lo deuh a ni pawhin kan Aizawl khawpui kawng a nawm nan chuan Traffic Police hi battalion khat lai ni mai sela a va ṭha mai awm ve. Mizote hian dan hi a theih chin china nek puar a, a sir aṭanga hel kan tum ṭhin tih he No Telerance Drive aṭang hian a tichiang awm e.

Kan traffice police-te hi an ṭha in, an zaidam ka ti riau. Mihring ve tho an nihna zawnah a ṭhen chu thinchhe deuh an awm mahna, mahse college kan kal laia boxer thinchhe ve tak pawh Traffic Police a awm hnu hian a zaidam riau. An hotute hian an chher ṭha tih a hriat hle; mi chi hrang hrang- traffic rules pawh hre lo, chapo ve hrim hrim, a ngaihna hre lo leh at huai ve hrimte an hmachhawn vek a ngai a. Heti chunga vin miah loa lirthei khalhtute an hmachhawn ka hmuh chang hi chuan ka fak lo thei lo a ni. Hawh u, kum tluanin No Tolerance Drive hi i hmang ang u.

- Lallianzuala Fanai