Chawhchawrawi!

Mizoram Synod Inkhawmpui vawi 99-na chuan eirûkna leh hlemhlêtna (corruption) do a rel a, hetianga hmalak tumna hi thil ṭha tak a ni. Kan hriat angin Mizoram corruption a hluar a, a dotu pawl hrang hrangten tihtak zeta an beih chuan a ziaawm tal tur a ni.

Tih tak takna tel lo chuan thil hi a hlawhtling mawh hle. Corruption hi Mizoram Synod hian do a rel ta sa sa, tih tak zetin a do ngam turah mipuite chuan kan ngai a, kan thlir reng dawn bawk. Mipuite beiseina hi min ti thlawn lul suhse.

Nakkumah Mizo­ramin inthlanpui kan hmachhawn dawn. Party hrang hrangten nasa takin tlin ngei tumin an bei chho mek a, hemi kawngah hian politics a inbeihna nasa tak tak a awm chho mek bawk. Politics a inbeihna inmung chho mek avang hian mipuite pawhin kan politician-te thu ngaihthlak dan kan thiam a pawimawh hle a, in puhchhiatna, in diriamna te, ṭhat lohna lai insawi tawnna te leh a dang danga inbeihna hi nakkumah phei chuan a nasa zual sauhin a rinawm.

Chung politics-a inbeihna karah chuan mipuite kan fin a pawimawh hle a, kan politician te thuken nazawng kha awi chin tawk kan thiam a pawimawh tak zet. Inthlan dawnah chuan kan politician-te hi miṭha leh mifel em em vek an ni leh dawn a, chung hunah chuan tu nge Pathian ṭhih mi tak tak tih kha mipuiten kan lo buk thiam a pawimawh viau ang.

Zoram dung leh vangah kumin kum tawp lam hian award sem a tam em em a, kan sawi vek seng lo ang. Tupawh a dawngte khan an phu em em a, mahse award kan pek ve lem loh mi ṭha, zaithiam etc. tam tak hi an awm ve tho tih i theihnghilh lo ang u.

Tunhnai lawk khan Union Ministry of Minority Affairs minister of state John Barla chuan, sorkar laipuiin sum a pekte tichingpen ṭhinah Mizoram sorkar a puh a, Kristian ram inti ngam state-a thil thleng atan zahthlak a tih thu a sawi. Hei hi amah mai ni lo, hnam dang a bikin central lam khuan Mizoram min hmuh dan a ni tel ngei a rinawm.

Hetiang din­hmuna min hmu ta hi tu thiam loh nge kan tih chuan kan politician-te leh sorkar hnathawkte pawh an tel vek a, Mizoram mipuite pawh kan bang bik lo.

Mipui nawlpui rilru milpui tawk Pathianin ramhruaitu min pe tih hi pawm ngam a hun tawh hle a, nakkuma sorkar tur pawh mipui nawlpui rilru milpui tawk kha an sorkar dawn tho tho.

- Joseph L Pautu