Bethlehem dai a nghawr vel e

Mi dangte an khuân hmain han khuân khalh ila, a khuang hmasa nge nge chuan a kai harh hmasa ṭhin an tih kha maw!

Kumpui lingleta kan hunpui nghahhlelh Krismas chu nakkin kan tih chhungin vawiin a lo ni ang a, chumi hun thleng tura kan inpuahchah danah hian fel tawk lo a awm ṭhin avangin, a inven lawkna dar ring deuh hlekin nu leh pate tan kan lo khâwn riksak dawn a ni. Bengchheng titu tan paw’n a dik thei ang a, i la khuang zâwi titu tan pawh a dik thei ang. In fa duatlaite

ṭawngkam fin chelh loh hian a hnu zela inrilru a hah loh nan, khuantevikah kan han khuang ṭan a ni. In hriat hauh loh khan in fa duatlai naupang chhe ena inente khan a hman nawm dan tur a luhaina bungrua nen an lo suangtuah ngam tawh tih hi ringhlel lo u la; chutih laiin, fate ruahmanna tam zawk a hlawhtlin hian chhungkua a hlawhchham lêt thung hlauh si a. Chuvangin, fate awmna chin hre lova kan awm loh nan nu leh pate’n bengvar kan chhuah lawk hi a va pawimawh em.

Van thlenga ro chhawm theih laka i ṭhahnem ngaihna leh i khuahkhirhna hi khuarei atan thleng pawha a nuna ser thianghlim lo thian fai thei a ni si a, i beng, i mit, a ṭulna hmun apianga hman theih turin lo chhiin lo tât hriam lâwk la, nakkin zela in chhungkaw tana ro ṭha i khawl khawm a ni mai.

Thil ṭha aia ṭha lo zawk nuna seng luh tum tlat ṭhin zawkna hunpuiah hian khap loh ngaihtuahna rilru nen Kristian ṭhalai Baâl hmaa

ṭhingṭhi ngai lo tam tak te hi hmun thim lamah kan insulpel leh nual lo’ng maw? Kan rinna hi khawi emaw lai thim hnuaia paih bo ngawt chu i phal lo vang u. I dam chhan pian cham hmun thim lama i biruksan a nih zawngin Bethlehem nau piang chibai buk dan turah hian i bangbo viau tihna a ni ta ve ang. Thim hlim bak chhe len huna nungchang mawi hi, zanlai âr khuan hun a thlen meuh chuan kan thlak danglam viau zel tawh mai ṭhin a ni. ‘Change’ zawng zawnga ‘change’ chhe ber chi tih i hria ang u. He laia kan mutân ni fo hi remchan nana lo hmang ṭhintu Setana thang a ni tih hria ila. Chumi thanga awk lo tur chuan tun aṭanga kan inven lawk hi a pawimawh. Thangkam zen chhin khertu ai chuan a kal peltu hi a him hlauh zawk ṭhin.

Beer kan han hmu thiang­hlim thar thut mai te hi chung lam aṭanga mitvarna kan dawn a nih a rinawm lo. Ngaihtuahna fim pawh pu thei lova lo nghakhlel ve ngawttute hian ran chaw pekna thleng aia chaw pekna thleng dang zawngin kan hrawk hi a phi leh ruai mai lo’ng maw? Van lal nau ang pian ni ruihhlo tel lova hlim taka hmang thei lo tlata inhriatna hi Kristian rama tih tur a nih kan ring em? Ngun takin han ngaihtuah ve teh.

Thisen thianghlim lo hmuh chhuah hmanga record duhawm lo tak siam tawhte hian meng phi chungin a chawchah awmna lam kan pan leh ruai ruai mai dawn chu a ni si a, rilṭam laia ei tur ṭha emaw tia tam zawk veh thlem theih an nih miau chuan kawngka hawnin a awm zel mai si a; pantu nun duhawm tak hi result duhawm loh takin a hmuah loh nana damdawi ṭha ber chu ‘tih ve chhin loh’ a ni. I châkna hmangin remchanna zawn tum suh, i insum theihna zawk hi ro hlu ṭha mi a ni. Kapkar puitlin vanga ngaihtuahna pâwn lang put ve ngawt hi tun dinhmunah chuan hlauhawm tak a ni. Kan dinhmun hre chiang chungin kan fimkhur a va ngai em?

Lemchanna tualzawl zau takah hian ringtu nia inchhal tam tak kan leng za a, fiahna huna fiah tlak nih tum ila, a va ṭha em. Hmasawn duhin nun dan, thiam chi hrang hrang kan zir chhuak a; nimahse, a tawp chu pian cham neitu nena kan inkar tho hi a ni. A lawm dan ṭha zawngin phili buai duh suh, i ngaihtuah buai ngai hauh lovin kohhran lamin programme thianghlim tak an lo ruahman sak ang che. Chumia tel tam chu a him

ṭhin, mahni lum luma lum ve ngawt mai te hi a ât-thlak tih hriat reng a ṭha.

Thil ṭha lo chin tharna hun emaw ti tlattute vang hian pian cham neitu hi a lungawi lo vang. Kan pian cham ngei pawh thianghlim taka hman duh ṭheuh kan ni si a, lei leh van lal pian cham mahni nuam tih zawnga hman kual vak mai hi ngaihtuah thuak pawhin a dik thei lo, ngaihtuah chian phei chuan dik lo zual viau ngei ang. Nge ni, kan ngaihtuahna ṭawp tak pho lanna hun remchang atan hman kan tum tlat zawk?

Thianghlimna ngai nep thar ta thut mai te hi kum thar a thlen huna mi aia mittui hru zing tur an ni a, “Kei zawng thianghlim takin ka hmang a, ka va inchhir tak em”, ti an awm ngai lo tih hre chungin tun aṭangin a hman dan thianghlim lam hi ngaihtuah ila. Inchhirnain a siam ṭhat theih tawh loh hringnun i hmachhawn loh nan tun aṭangin a hman dan thianghlim lam i rilruin lo suangtuah lawk rawh se.

- H. Zonunsanga Venglai, Kolasib