I dem ngam ang u
Ka ram hmasawnna tur sum mahni tana lo hmang ta daih te, hlawh phu loa hausa te, eng nge an thawh hriat mang loha hausa lutuk te, sorkar leh ram phal loh ti hreh miah lo te an awm ta a, heng mite hi zak miah loa khawlaia an leng hmuh hian ka thin a rim ṭhin. Heng mite hi khawtlang hian dem ila, i kawk ang u.
Kan ramah hian thil ṭha tam tak awm mahse, sualna a tam ve hle. Mi ramah chuan sumdawng te, kuthnathawktute an hausak laiin kan ramah chuan sorkar hnathawk te, kut tling loa sum la lut ṭhin te, sorkar phal loh tawlhru ṭhin te an hausa ta, heng mite hi dem turte chu an ni.
Khawtlang hruaitu ni chunga dik lo taka sum lak luh hreh miah lo, rawngbawltu ni chunga dik lo taka thil tih hreh lo, YMA ni chunga dan phal loh tawlhru hreh miah lo tam tak an awm. Heng mite hi an awmna vengte ṭheuh khan dem luih luih teh u. Kan ram leh kan khawtlang hi kan tu leh fate ṭhanlenna tlakah i siam ang u.
Dik lo taka thil tih hreh lo kan sawi tak te hi mi ṭhenkhat chuan sum an neih avangin an tlawm emaw tih turin an kawm tlangnel a, an sum leh pai neih an it avangin khawtlangah an ti tlangnel. Dem tur kan sawi ang chiah hian mi dik lote khawi ngamtute pawh hi i dem ngam ang u.
Dik lo taka thil titute lo ṭan tlattute pawh hi i dem ang u; an neih hmangin khawtlang lei an tum a ni. Anni tel lo hian zahawm takin pawl hi a kal thei e.
Heng mite hi an ze ṭha lo te, an thil tih dik lo te thup nan inkhawm an taima hle a, an inkhawm kim thlap thlap thei nia! Heng mite hi Kohhran hote pawh hian thawhlawm an thawh tam avang te, an inkhawm taimak avang te hian rawngbawltuah i ruat lo hram ang u.
Dik lo taka sum lak luh pawh hreh lo khawpa zakthei lo chu, khawtlangah a langsar ber ber nih an tum a, pawl thil tihkhawmah sum an chelek hle, thlan laih te, mitthi lumen te, hnatlan nikhua-ah pawh pawisa phawrh hmasa a ni zel a. Khawhar in kal an taima viau bawk a, mah se an ze khelh hi hre tlat ila, dem ila, khawtlangah mawhphurhna leh chanvo i pe lo ngam ang u.
A chunga kan sawi tak mihring te hi kan ramah an pun a, an vawklal len loh a, an inkiltawih a, mitinin dik taka thil tih duhna rilru leh thinlung an put theih nan a dika te hian ṭan la ngam ila. Dikna a lal theih nan mi dik lo te sawiselin kan hnawl ngam a hun ta e.
Kan ram hi keimahni chauhin kan luah dawn lo a, kan tu leh fate luah tlaka kan siam theih nan tuna a ṭha lo lai kan sawite hi dem ngam ila. Kan tu leh fate, ṭhangthar lo la awm zel turte luah tlakin kan ram hi i siam ang u.
- Lalhlimpuia Hmar