Muanawm takin Krismas kan hmang dawn

Kristian-te tana hun ropui, khawvel sual laka min chhandamtu piancham phaphak ‘Krismas’ chu a lo thleng dawn ta reng mai. He kan hunpui hi tun aṭanga a landan chuan ‘muanawm takin kan hmang dawn’ tiin sawi ila a sual tam lo ang.

Muanawm taka kan hman theih chhan tur chu Remna Lal piancham phaphak a ni tlat. A piah lamah Kristian state kan ni a, vai puja ang mai maia ropui tuma hmang tur kan ni lo a, a thei fate leh a pawl ang pawha luanchhuahna remchang, mi harsa leh chhumchia zawkte chhawmdawlna hun atana hmang an tam em avangin Pathian pawhin mal min sawm ngei ang.

Sorkar leh NGO-te thu kan awihna hian a muanawm zawngin hna a thawk tlat bawk. Thla hnih vel kal ta aṭang khan puakthei thil leh halmawi lam khap a ni a, zawm lo tlemte an awm karah kan dawrkai sumdawngte'n an zawm ṭha em em ringawt pawh hian thuawihna nun neia muanawm taka hmang tura ngaih kan ni. Kumin hian boruak chhia tichhuak thei ang chi a rik loh a bei­sei awm em em bawk.

Kohhran thu kan ngaichang em em te hian he hunpui hi a muanawm a rinawm tlat bawk. Kohhran hrang hrangah zirtirna ṭha tinreng kan in zirtir a, pulpit aṭang leh maicham aṭanga nunkawng dik zawhna tur lam a ri chamchi hian zawm a hlawh a, a thlamuan thlak bawk.

Sorkar a muthlu lo a, dan leh thupek keng­kawhtute pawhin an hna an thawk ṭha viau mai. Traffic police lam lahin chetsual vengin khawpui chhungah theihtawp an chhuah a, lirthei document fel lo dapchhuah hna thawkin 'No tolerence' hun an siam a, chu chuan lirthei dik lo leh hlauhawm khawpa ṭawng khalh chhuah a veng a, hei ringawt pawh hi a thlamuanpui awm viau. Mi tam takin lo ning viau mahse mi dik leh dan ang thlapa lirthei neitute tan chuan a lawmawm viau bawk.

YMA lam thu kan awihna hian kan khaw­­tlang nunah nasa takin thlamuanna min pe ti ila a sual tam lo khawp ang. Central YMA lam­ah hruaitu ṭha tak tak kan nei te hian kan ram a ti ralmuang hle. Buaina leh harsatna awm se, sorkara a kaih­hnawih dan leh thupek kengkawhtute nen ṭangrualin boruak an tidai zung zung ṭhinte hian an lakah kan innghahzia te, kan rin­ziate a tilang chiang hle.

Kumin Krismas leh kumthar vuakvetah pawh dan leh thupek kengkawhtute thu kan awih a, Central YMA ngenna te kha kan zawm chuan eng vangin nge muanawm taka Krismas leh kumthar lo thleng tur hi kan hman liam loh ang le. Ṭang tlang i la, buaina leh harsatna chhuak thei lakah inveng zel ang u.

- Nghinglova