CORRUPTION DO
Mizorama kohhran lian ber Presbyterian inkhawmpui lian SYNOD chuan corruption do an rel thlu niawm tak a ni a, a ropui hle mai. Corruption hi eirukna ti lovin 'hlemhlêtna' tih ka duh zawk, mipui/sorkar pawisa eiru thei dinhmuna ding phak lo mipui nawlpui hi kan corrupt/ hlemhlê ve ṭhin bawkin ka hria.
Corruption do tur chuan kohhran hian target nei lian lutuk lo se a ṭhain ka hria. Mipui hi hlemhlêtna laka fihlim turin min zirtir se mipui nawlpui hi hlemhlêtna/ corruption lakah fihlim thei ila a ṭha khawp mai.
Inhlan a lo hnai leh ta a. MLA candidate ni tur nia kan hriatte laka beiseina ṭha lo tak kan lo neih ṭhin te hi bansan turin YMA leh Kohhran hian min zirtir se ka duh khawp mai.
1. Ruang phurh.
2. Sporting Club-in tournament buatsaih tura beisei leh jersy dil chin.
3. Damdawiin bill tum sak tura in beisei leh in kar deuh te.
4. Inthlan dawn kuma fate hostel/ school fee indaih loh tlat te.
5. NGO ten engemaw programe siama candidate beisei nia an hriat te laka pawisa beisei te.
6. Constituency bil zirlai pawl, inthlan hnaih chauha active ṭhin te.
Kan sawi seng lovang.
Vawi hnih MLA candidate ka nih tawha ka experience aṭanga ka hmuh dan chuan mipuiin candidate te laka sum an beisei ṭhin dan hi candidate te sum neih danah a innghatin ka hria. Candidate sum ngah deuha an hriat chu an zen nasa mai, candidate sum nei lo nia an hriatah sum an beisei lem lo, workers te an thatchhiat phah chuang lem lo bawk. Candidate sum ngah nia an hriat si, uikawm deuh lakah erawh chuan workers te an titau duh viauin a lang.
Tuirial bye election zawh khan party hrang hrang workers te kan han titi pui a, kan han review khan kan pawisa senna ho zawng zawng kha keimahni party workers te mai maiah zawk vek a lo ni tih kan pawm tlang hlawm viau. Hetiang lak aṭanga fihlim tur hian kohhran leh YMA hian min zirtir ṭha se, kan sim thei ange maw?
Party tin block leh unit hruaitu te'n bial viltu tur neih hma an duh chhan pawh hi sum bawm zen sak theih candidate tur neih thuai thuai an duh ni berin a lang.
- Lalmuanpuia Punte