MLA ngah berin ro an rel ka ring lo

Kum 2023 hian Mizoramin roreltu kan thlang leh dâwn a, nakkum mai hi a ni ta a, chu chu kan kutah a innghah rual hian a innghat lo tiin kan sawi thei bawk ang.

Kan thil sawi hi thil thleng ngei ngei tur ni loin thil thleng thei a nia kan ngaihtuah ngun hunlai tak a nih mai bakah tun hi voter lam kan ṭan rual hun a ni a. Kan tlai tawh meuh chuan Nagaland leh Manipur angin BJP hnuaia kun hi kan hmabak a ni mai.

BJP hian Union Minister hmangin campaign an ṭan der tawh tih hi mipui nawlpuiin kan hre loa mahse politics ngaihven chuan an hre tawh a. Union Minister lo kal apiangin MNF sorkar an bei an bei tawh a, a chhan chu BJP hian MNF sorkarin Dr BD Chakma an tih dana lungawi lohna an lan tir ṭan a ni.

Dr BD Chakma hi BJP MLA a ni a, NDA hnuaia thawk ho an nih avangin Mizoramah pawh Dr BD Chakma hi Treasury Bench lama ṭhu be ngei ngei tur a ni. Mahse MNF hian Mizo mipui lakah lem an chang a, BJP nen thawk dun anga lan hrehin BJP MLA chu Opposition Bench ah an dah a. Kan Lok Sabha MP ve lah chu NDA lamah awmin Treasury Bench lamah Parliament House ah chuan an ṭhu lawi si a ni.

BJP Union Minister lo zin apiang hi Mamit leh Lawngtlai leh Siaha lamah an kal tlang zel tawh a, kum 2023 a kal thut aiin tunah hian an lo vaw dup lawk a. Lawngtlai chu a dup tawh hle a, Hachhek leh Mamit Bial pawh BJP hian lâk an tum.

Tuichawng bial chu bel chhung sâ a ni a, Dr BD Chakma a tling leh anga Tuipang bial pawh Congress ni lovin BJP in an chan an ring tawh a ni. Lawngtlai Bial pahnih pawh an tum a, Siaha hi MNF pahnih Dr Beichhua leh Pu HC Lalmalsawma Zasai inchuh karah BJP hi luh an in beisei bawk a ni.

BJP hian MLA 3 an neih chuan sorkar a tel hrim hrim hi an target a, Nagaland leh Manipur lama an bul ṭan dan ang chiah khan luh theih dan an zawng a, fing verther deuh tak pawhin thil an rawn ti leh duh ngei ang tih hi rin lawk sa theih a ni.

BJP hi Mizoram chhungah hian an rawn hlawhtling a nih chuan tuna MNF sorkar thiam loah kei chuan ka ngai ang.

- Mamawitea, Mission Veng