Police Officer tih ni loin Officer tih tawp tur

Tun lai hian Police Officer-in an naute an in sa tura an chhawr nasatzia sawi a tam ta hle mai. A hriat pawh kan hre zing ta malh malh a, Police beih duhna rilru kawi aṭanga rawn chhuak a nih rinna lian tak a piang nghal a ni.

Police Officer kan bei dawn a nih chuan Officer dang pawh hi khei ve fek fek ta ila. Agriculture, Horticulture, Fishe­ries, Education, Tou­rism, Mizoram State Sports Council, Autonomous Dis­trict Council, Rural Development Engi­nee­ring department, Revenue, Supply leh Engineering Department te hi tunge fihlim?

Police Officer vanduaina chu an nau chhawrten Uniform an ha ṭhin hi a ni. Hriat an awlsam a, chu bakah an motor-ah Police tih a inziak bawka hriat a awl viau a ni.

Police Officer motor pahnih kawl hi chu chhuhsak theih chu ni se duhthusam a ni a. DGP bak hi chuan motor pakhat chiah kawl se, an duh chuan Pool tiin dah se an la pawt thei a, nupui fanaute puala sorkar motor hman tam lutuk hi kan tihtawp a ngai.

Police Station tam takin petrol neih loh vanga case an umzui theih loh laia Police Officer nupui Police motora an chuang hmuh hi chu a ropui lo a ni.

Mizorama huan nei ṭha chu Horticulture Officer leh Agriculture an ni a, sangha dil nei ṭha chu Fisheries Department thawktu emaw an chhungte emaw an ni an tih hi a finfiahna document nei ve phak lo mah ila hawi kual vel pawh hian Officer hlawha neih phak loh tur huan, dil leh ram ṭha tak tak nei Officer an tam si a. David Sailo pawh a rawn au chhuah tawh kha amah tak hi hre mah suh ila a sawi kha an hlau hle an ti.

Revenue leh Supply leh RD te bakah rin loh takin State Sports Coulcil lam pawh hi an hausa chak hlawmin chenna in an neih ṭhatzia hahipin an sawi a (eiruk lam chu kan hre phak lo).

Tun hmaa PWD Engineer kan sawi ang mai kha an ni an ti a, hetiang hian Police chauh ni lovin Officer dang pawh hi i en chiang ve ang u.

- Lalrinpuia