CACHAR - ASSAM NENA KAN RAMRI MAWLH MAI HI AW

Kan hriat angin Kan­hmun khaw piah lawk, hmar lam Mitdeli lui in Lang­kaih lui a finna aṭanga hmar chhak hawiin Hachhek tlangdung hmar tawp Thirphun tlang, tuna Hriphaw khua aṭang mel 15 velah, chuta ṭanga hmarchhak zawngin Silchar khawdai Tuiruang thlengin ramri atana siam kha, chhan hrang hrang avangin, Mr. Cosgraves 1929-33 vela Assam ram Chief Secretary ṭhin khan, ama thu thua a lo tih danglamna chu 1933-1935 ah, thuneihna hmang sualin alo siam danglam ta a. Chumi avangin Assam leh Lushai Hills ramri hi vawiin thlengin a buai ta, kan inchuh ta a nih hi mawle.

Assam Official zingah Mr. Cosgraves kha Zofate hmelma no. 1 a ni a. MZP, MSU ten a lim hi kan va hal har tawh ve? Kum tin heng organisations:- 1) YMA, (2) MZP etc. ten ram leh leilung humhalh nan he kan hmelma no.-1 lim hi hal ziah a hun ta e.

China ral lian turte lo thlen hma hian rem chan hun hunah Mr. Cosgraves a lim hi hal kum tin teh ang u.

Pathian, leilung leh a chhunga cheng zawng zawng chunga thuneitu chuan mitin te hnenah he leilunga chen hi a phal vek a ni. Kan ram sq. miles 509 chhunga tuna lo cheng tawh mek Hindu leh Masolman ho zawng zawng nen khuan, engtik niah emaw chuan Lal Isua hmaah kan la kun tlang ngei ang a. Keini Zofate ang thoa Lal Isua tlan sa, a berambo te an nih te hi i ngaihtuah fo ang u.

Kan hla in “Eng tik nge Isua hmaa an kun ang? An tlantu tih hriain a lalma, hming fakin” a lo tihte kha i ngaihtuah fo ang aw! Kan state hnuaiah zawng Lal Isua hi Lal atan an pawm ve mai na chance remchang a awm ngei ang.

Keini pawh kum 1890 hmalam te kha chuan Pathian Lal Isua hming reng reng kan hriat ṭhin loh kha! Chanchinṭha mitin ta tur hi, anniho tan pawh a ni si a, Bethlehem arsi tih te, Kalvari leh Lal Isua thawhlehna te chu an hriata an pawm hun tur hi, Lal Isuan a nghak reng a ni.

Kan Lal Isua tan:- (1) Ram leilung te, (2) Lalpa thuthlung bawm zawn tu, kan Kohran Synod puithiamten, Silchar Cachar phaiah, ram a lo neihna, (Hauhna) Hualna atan India Independent hma daih tawhah khan, Silchar-ah Mission Compound an lo siam tawh a nih kha. Kan Synod Vision te tih hlawhtling a, Lalpa kan Pathian tana ram la zel turin ṭan (kawng tin rengin) in la thar leh teh ang.

- Dr Lalsawmliana Sailo