PMJVK sum hmanna hi i chik ang u...

Union Minister of State for Minority Affairs John Barla lo zin khan tun laia sawi hlawh tak Pradhan Mantri Jan Vikas Karyakram (PMJVK) chungchang an sawi kha chanchin thar lamah kan lo ngaithla ve a. Mizoramin PMJVK kan hman duh dan hian kan mizia a ti lang niin a lang.

Kan mizia bakah kan sorkar nihna dik tak pawh a hai lang (expose) chiang lehzual a. Kan Chief Minis­ter ngaih pawimawh lam pawh kan hmu a, kan kal zelna atan ṭhangthar mi thiamten i chik lehzual ang u.

Tun hnua kan hriat ve leh hnuhnawh aṭanga lang chu Mizoram sorkar hian PMJVK hnuaiah hian cheng vaibelchhe 200 chuang a hmuh chu Minirity Affairs department lam chuan an chang ta hauh lo mai! Chhei le, tu kutah nge a luh kan tih chuan Sports Department leh ICT Department lamah a lut ta hiau hiau a ni. The Frontier Despatch chanchinbu ziah dan phei chuan (an website lama awm) Northeast Consultancy Services (NECS) chu PMJVK hnuaiah hian DPR leh Concept Note siam tura rawih tura thlan chhuah an ni a. April 25, 2022 khan NECS rawih tur tih hi DWAB in an lo pawm dim diam tawh a, he meeting neih hma hian Chief Minister, Finance Minister leh Minoroty Affairs Minister (Pu R Lalzirliana) te chuan NECS pawmna hi an lo pe diam tawh a ni.

State dangin PMJVK an hman ṭangkai dan kha kan lo hmu tawh a, state dang chuan zirna (Education) leh hriselna lam (Health) atan an hmang nasa hle a ni.

Mizoram hi kan hniamna kan sawi chuan Health lamah kan hniam hle a, kan District Hospital meuh pawh inzaina tlak mang lo khawpa tlabal, rikrum thilah pawh Aizawla in thawn ngai an la nih nasat laia Sports Department tana PMJVK kan pe zar zar mai hi MNF sorkar tan hlei hlei hian a ṭha lo zawk a ni. Education hi kan hniam em em a ni.

NABARD aṭangin pung tam tak awmin pawisa a vaibelchhe telin kan puk a, mahse School Education Minister hian PMJVK pawisa hi a dawng ve thei lo em ni? Hetiang thil hi kan chik ve zel tawh ṭhangthar te hian.

Kan ram hmasawnna tur sum lo kal hi a nihna turah hman a nih loh chuan kum 2023 inthlan hma hian mipui an au dawn a, kan ram hian thudik a hriat chuan, 'Ekhai a, a lo va mak em em ve le!' tih tur hi a ngah ang, chu vangin PMJVK hi Education leh Health atana hman theih turin a concern Minister te pawh hian Chief Minister hi be ve ngam se, an bial mipuite pawhin nawr se, PMJVK sum hi i sem rual ang u khai, Mizoram pawisa tur liau liau a nih hi.

- John L Ralte,

Chanmari West