LIRTHEI DOCUMENT CHUNGCHANG THIL PAHNIH

Kum dang ang bawkin zahngaihna tel hlek lova lirthei document fel lote man hmak hmak hun kan thleng leh ta a, hemi pual deuh hian, mipuite tan a samkhai zawk nan sorkarin ti se, hetiang hian hma la se tih te ka lo nei ve luk lak a.

Pollution check booking app

Kumin kum laihawl aṭang khan lirthei pollution test-na (New Capital Complex bikah) chu thui tak an intlar ni tin mai a. Tunlai phei chuan Secretariat gate bul thleng te an intlar ṭhin.

Hemi sutkianna atan, Transport department lama kan hotute hian mobile application siam sela, chutah chuan booking ti mai ila. Mahni tih hun turah kal thek mai ila, hun tam tak kan hlep dawn a ni. Pollution test-na revenue aṭangin application siam (develop)-na tur chu a daih zãn tawhin a rinawm.

Document checker:

Traffic lama kan hotute hian hetiang mobile application bawk hi siam sela. Lirthei nei zawngin application hmang ila, mahni registration number aṭangin kan license, pollution, insurance expire hun tur te check thei ila. Tuna lirthei neituten dan an bawhchhiat tam tak hi pumpelh theih a nih rinawm.

Revenue gene­rate an duh chuan app-ah khan hnawksak lo tur tawkin ads phum mai sela, a hlawk tham ang.

Transport depart­ment hian tun hnaiah online-a license/ learner dil theihna an siam a, hei hi a ṭhain an fakawm ka ti hle mai. Tin, LPG online-a booking tih theihna te, tui (water) leh êng (electric) fee te pawh online-a pek theih a ni ta bawk a. Heng lo pawh technology ṭhan ruala hma kan sawnna sawi tur a awm nual ang. A lawmawm tak zet.

Tunlai chang­kanna leh hma­sawnna mil zela ke kan pen thiam chuan sorkar leh mipui tan awl­samna a thlen zel dawn a ni.

- TSA Khupchong